მამა ანდრია სარია მღვდელმთავრების განცხადებას, რომ ზიარება ანტისეპტიკია, ეხმაურება და ამბობს, რომ ეს "საეკლესიო დარღვევაა". როგორც ანდრია სარია ამბობს, იმის თქმა, რომ მორწმუნეებს კორონავირუსი არ შეეყრებათ, "სიგიჟეა".

ანდრია სარიას თქმით, ადამიანები არ უნდა დააშინონ, თუმცა ბევრი ისეთი საეკლესიო ჭურჭელი არსებობს, რომელიც ბაქტერიას შეიცავს და მათი დროებით შეცვლა, დოგმატური საკითხი არაა.

"პირველ რიგში ადამიანის ჯანმრთელობა არის მნიშვნელოვანი. მე არსად მითქვამს, რომ მაინცდამაინც კოვზის თემიდან გამომდინარეა ზიარების საკითხი პირდაპირპროპორციული საიდუმლოებასთან მიმართებით. მე ვამბობდი, რომ ზიარების საიდუმლო შესაძლოა ბევრი სხვადასხვა ფორმით მიეწოდოს ადამიანს. თუნდაც იგივე ბაღდადის თემა, როცა ადამიანს ვუწმენდთ ზიარების შემდეგ, ისიც თავისთავად შეიცავს ამ ბაქტერიულ საკითხს... ჩვენ ვკვდებით ჩვეულებრივად. ქოლერით მოკვდა პატრიარქი ლეონიდე და ის, რომ ვთქვათ, რომ მას ეპიდემია არ შეეყარა და სნეულების საშიშროება არ ჰქონდა, ეს არის სიცრუე", — განაცხადა ანდრია სარიამ TV პირველის ეთერში.

29 თებერვალს ცნობილი გახდა, რომ საქართველოს საპატრიარქო საერთო კოვზიდან ზიარების წესის შეცვლას არ აპირებს და კორონავირუსთან დაკავშირებით გავრცელებულ განცხადებაში წერს, რომ სიცოცხლისთვის საშიში ინფექცია აქამდეც არაერთხელ გავრცელებულა. მათი თქმით, ზიარებისთვის ერთი კოვზის გამოყენების პრაქტიკა ათასწლოვან ისტორიას ითვლის, "მორწმუნეები კი ამას არ უშინდებოდნენ".

"საერთო ბარძიმიდან საერთო კოვზით ზიარებას, პირიქით, კიდევ უფრო ხშირად მიეახლებოდნენ, რადგან, როგორც ყველამ ვიცით, წმინდა ზიარებისას ადამიანი იღებს ქრისტეს წმინდა სისხლსა და ხორცს".

საპატრიარქო სიცრუეს უწოდებს მედიაში გავრცელებულ ინფორმაციას იმაზე, რომ რუმინეთის მართლმადიდებლურმა ეკლესიამ, ვირუსისაგან თავდაცვის მიზნით, ზიარებისათვის ერთჯერადი კოვზების გამოყენების ნებართვა გასცა.

საპატრიარქოს განცხადებითვე, კვირას, პირველ მარტს, შენდობის ლოცვის წაკითხვის შემდეგ, ყველა ეკლესიაში შედგება ტაძრის გარშემო ლიტანიობა, ნაკურთხი წყლის სხურება და ხალხის დალოცვა.

ახალქალაქისა და კუმურდოს მიტროპოლიტი ნიკოლოზი ამბობს, რომ ღვინო, რომლითაც მრევლი ეზიარება ანტისეპტიკია. გარდა ამისა, ის მოქალაქეებს ურჩევს, რომ სახლში ნაკურთხი წყალი მოაპკურონ.

ვირუსის გავრცელების პერიოდში ზიარებისას საერთო კოვზების არგამოყენებაზე ნაციონალური მოძრაობის ლიდერმა რომან გოცირიძემ განაცხადა. მან ეკლესიებს ურჩია, ზიარებისას ერთჯერადი კოვზები გამოიყენებენ, რაც ეს "პროგრესული და თამამი ნაბიჯი" იქნებოდა:

"რამდენი მილიონი ადამიანი გადაარჩინა ერთჯერადმა შპრიცებმა, სხვა მსგავსმა, ერთი შეხედვით მარტივმა ”სამეცნიერო-ტექნიკური პროგრესის” მიღწევებმა?! რატომ არ შეიძლება, რომ ზიარებისას ერთჯერადი კოვზები იქნას გამოყენებული?! ამ გაგანია ვირუსობის პერიოდშიც კი ხმას რომ არავინ იღებს ამაზე?"

29 თებერვალს საქართველოში კორონავირუსის მესამე შემთხვევა დადასტურდა. კორონავირუსით ინფიცირების პირველი შემთხვევა საქართველოში 26 თებერვალს დაფიქსირდა, მეორე კი დაავადებათა კონტროლის ცენტრმა 28 თებერვალს დაადასტურა.

ვირუსის პირველი შემთხვევა დაუდგინდა საქართველოს მოქალაქეს, რომელიც აზერბაიჯანის გავლით ირანიდან შემოვიდა ქვეყანაში. მეორე კი პირს, რომელსაც ჩრდილოეთ იტალიაში მოგზაურობის ისტორია ჰქონდა.

გაიგეთ მეტი კორონავირუსის პრევენციის შესახებ: