დღეს, 4 ნოემბერს, ზვარეში რკინიგზის მშენებლობაზე დასაქმებული მუშების მხარდასაჭერი აქცია-მსვლელობა თბილისში გაიმართება. აქცია დაიწყება 5 საათზე ცინცაძის 24-ში, ბრიტიშ პეტროლიუმის ოფისთან, სადაც ნავთობის პროფკავშირი მართავს აქციას, შემდგომ კი ყველანი ერთად მსვლელობით საქართველოს რკინიგზასთან გადაინაცვლებენ.

აქციის ორგანიზატორები მოითხოვენ:

  1. დადგეს ადგილობრივი მენეჯმენტის პასუხისმგებლობის საკითხი და შინაგან საქმეთა სამინისტრომ მიანიჭოს ინციდენტს შესაბამისი კვალიფიკაცია.
  2. ამ დრომდე, მომხდარზე პასუხისმგებლობას არ იღებს საქართველოს რკინიგზა, მიუხედავად იმისა, რომლის ქვეკონტრაქტორიც არის აღნიშნული კომპანია. რკინიგზაში აცხადებენ, რომ ზვარეში მომხდარი ინციდენტი სხვა კომპანიის შიდა პროცესებია, რომელზეც საქართველოს რკინიგზა ვერ გააკეთებს კომენტარს.
  3. რკინიგზის ადმინისტრაცია სასწრაფოდ ჩაერთოს პროცესში და აიღოს შესაბამისი პასუხიმგებლობა მის ქვეკონტრაქტორ კომპანიაზე. საზოგადოებისთვის ცხადი უნდა გახდეს თუ როგორ და რა გზით შემოვიდა საქართველოში მსგავსი დამსაქმებელთა ჯგუფი.
  4. ანაზღაურდეს იძულებითი მოცდენა საქართველოს რკინიგზის მიერ, იმის გათვალისწინებით, რომ ამჟამად გამოძიების მიერ ობიექტზე სამუშაო პროცესი შეჩერებულია.
  5. ხაზი უნდა გაესვას იმას, რომ ზვარეს შემთხვევა არ არის პირველი და არ უნდა მიენიჭოს ამ თემას შოვინისტური ხასიათი.

აქციის მონაწილეები ითხოვენ, რომ დაუყონებლივ გადაიხედოს სახელმწიფოს მიერ შრომის პოლიტიკა და დაჩქარდეს ქმედითი შრომის ინსპექციის შექმნა.

3 ნოემბერს, ხარაგაულის რაიონის სოფელ ზვარეში, რკინიგზის ლიანდაგის მშენებლობაზე დასაქმებული რამდენიმე მუშა კომპანია ჩინეთის რკინიგზის 23-ე ბიუროს წარმომადგენლებმა სცემეს. თავდაპირველად, შინაგან საქმეთა სამინისტრომ On.ge-ს განუცხადა, რომ აღნიშნულ ფაქტთან დაკავშირებით გამოძიება სისხლის სამართლის კოდექსის 125-ე მუხლით დაიწყო, რაც ცემას გულისხმობს. 3 ნოემბერს, დღის ბოლოს, სხეულის განზრახ ნაკლებად მძიმე დაზიანების ბრალდებით, ჩინეთის სახალხო რესპუბლიკის სამი მოქალაქე დააკავეს.