ამერიკის შეერთებული შტატები შეშფოთებულია იდლიბის პროვინციაში თურქ ჯარისკაცებზე თავდასხმის გამო და მხარდაჭერას უცხადებს თურქეთს, როგორც ნატოში მის მოკავშირეს. ამის შესახებ ინფორმაციას სააგენტო როიტერსი, სახელმწიფო დეპარტამენტის განცხადებაზე დაყრდნობით ავრცელებს.

"ჩვენ მხარს ვუჭერთ ნატოში ჩვენს მოკავშირე თურქეთს. მოვუწოდებთ ასადის რეჟიმს, რუსეთისა და ირანის მიერ მხარდაჭერილ ძალებს, დაუყოვნებლივ შეწყდეს ეს საშინელი თავდასხმა", – ნათქვამია განცხადებაში.

სირიის ჩრდილო-დასავლეთში, იდლიბის პროვინციაში მომხდარი საჰაერო თავდასხმის შედეგად მინიმუმ 33 თურქი ჯარისკაცი დაიღუპა და 30-ზე მეტი დაშავდა. ამის შესახებ ინფორმაციას საერთაშორისო მედია ავრცელებს. სხვა წყაროებით ვრცელდება ინფორმაცია, რომ დაშავებულების რაოდენობა უფრო მეტია.

თურქეთის ოფიციალური პირების განცხადებით, თავდასხმა სირიის სამთავრობო ძალებმა განახორციელეს. მათივე თქმით, რუსული რეაქტიული თვითმფრინავები წინა კვირის განმავლობაში ამ რეგიონში მიმდინარე თავდასხმებში იყვნენ ჩართულნი.

თურქული მედიის ინფორმაციით, პრეზიდენტმა რეჯეპ ტაიპ ერდოღანმა ხუთშაბათს ღამით ანკარაში საგანგებო შეხვედრა გამართა. შეხვედრის შემდეგ თურქეთის ძალები სირიის წინააღმდეგ დაპირისპირებაში ჩაერთვნენ.