ახალციხის მუნიციპალიტეტის სოფელ ზიკილიანში იოსებ სტალინის მონუმენტი აღმართეს. ინფორმაციას ამის შესახებ გამოცემა სამხრეთის კარიბჭე ავრცელებს.

როგორც ადგილობრივებმა გამოცემას უთხრეს, მონუმენტი მათ თავისი სახსრებით ერთი თვის წინ გააკეთეს.

"არავის მივცემთ უფლებას, რომ ჩამოხსნან. ეგ ერთი კაცი გვყავდა მსოფლიოში, ახლა რომელია ასეთი კარგი მითხარით", — ამბობს ადგილობრივი.

სოფელში მერის წარმომადგენელმა გრიგოლ ღამბაშიძემ კი განაცხადა, რომ მონუმენტის აღდგენა მოსახლეობის სურვილი იყო და მათ წინააღმდეგ ვერ წავიდოდა.

კანონი თავისუფლების ქარტია საჯარო სივრცეში კრძალავს საბჭოთა ტოტალიტარულ და ფაშისტურ სიმბოლიკას, საკულტო ნაგებობებს, ძეგლებს, მონუმენტებს, ბარელიეფებს, წარწერებს, ასევე, ქუჩების, მოედნების, სოფლებისა და დაბების სახელწოდებებს.

On.ge ცდილობდა, რომ ახალციხის მერს დაკავშირებოდა, თუმცა უშედეგოდ. მერიის პრესსამსახურში კი განაცხადეს, რომ ინფორმაციას მონუმენტთან დაკავშირებით მხოლოდ ხვალ მოგვაწვდიდნენ. გარდა ამისა, On.ge პასუხს ელოდება სახელმწიფო უსაფრთხოების სამსახურისგან.