ხარაგაულის რაიონის სოფელ ზვარეში, რკინიგზის მშენებლობაზე დასაქმებულები მოსახლეობასთან ერთად აქციას მართავენ, გუშინ 3 ნოემბერს მომხდარი ინციდენტის შემდეგ. ერთ-ერთი დასაქმებული გიორგი თაბუკაშვილი On.ge-სთან საუბარში აცხადებს, რომ მუშები გვირაბში სამუშაოდ მანამ არ შევლენ, სანამ არ შეიცვლება კომპანიის მენეჯმენტი:

"პირდაპირ ჩეხვაზე გადავიდნენ და არა ცემა ტყეპაზე. ალმატურებით, დანით ნაჯახით და თუკი რაიმე ხელში მოყვათ ყველაფრით. პირდაპირ პოლიციის თანამშრომლების თვალწინ, დანით ხელკეტით, გამოიწიენ დასარტყმელად და ვინ მომცემს იმის გარანტიას რომ ისე, სხვა დროს სასიკვდილოდ არ გამიმეტებენ".

მუშები ითხოვენ რომ ხელისუფლების წარმომადგენლები ჩავიდნენ ზვარეში და მათ პრობლემებს გაეცნონ:

"აქ აუცილებლად უნდა ჩამოვიდნენ ხელისუფლების წარმოამდგენლები, აუცილებლად უნდა მოგვაქციონ ყურადღება. არანაირი შერიგება, არანაირი დათმობა აღარ იქნება, აქ ყველა უნდა შეიცვალოს. მე ვინ მომცემს გარანტიას, როცა ორი კილომეტრის მანძილზე მიწაში ვარ შესული. აქ ბიჭები ისეთ პოზიციებზე ვმუშაობთ, ოდნავ ხელის წაკვრა და უბედურ შემთხვევას მიაწერენ კაცის სიკვდილს".

გიორგი თაბუკაშვილი აღნიშნავს რომ დამსაქმებელი კომპანიის წარმომადგენლები, მას შემდეგ გახდნენ აგრესიულები, რაც შრომითი ხელშეკრულება გაუფორმდათ:

"გაბრაზებულები იმიტომ არიან რომ აქ აქციებს როდესაც ვმართავდით, იქედან გამომდინარე დადეს ჩვენთან ისეთი კონტრაქტები, რაც არ უნდოდათ. მათ სურდათ აღვირაშვებულები ყოფილიყვნენ და თავის ჭკუაზე უნდა გვემუშავა. რადგან შეზღუდვები დაინახეს, მოსახლეობის მიმართაც აგრესიულები გახდნენ".