გასული წლის მიწურულს, 20 დეკემბერს ნეტფლიქსზე ახალი სერიალის — The Witcher-ის პრემიერა შედგა, რომელმაც მალევე მილიონობით მაყურებლის ყურადღება მიიპყრო. სულ ცოტა ხნის წინ კი შოუს მეორე სეზონის შესახებ გახდა ახალი ცნობები საჯარო.

21 თებერვალს ნეტფლიქსმა ოფიციალურად დაადასტურა, რომ ახალ სეზონზე მუშაობა დაიწყო. მეორე სეზონში მთავარ როლს კვლავ ჰენრი კავილი შეასრულებს, ხოლო იენიფერისა და ცირის როლში უკვე კარგად ნაცნობ ანია ჩალოტრასა და ფრეია ალანს ვიხილავთ ისევ.

აღსანიშნავია, რომ ძველ სამსახიობო გუნდს შვიდი ახალი სახე შეემატა: იესენ ათორი, აგნეს ბიორნი, პოლ ბულიონი (Peaky Blinders), ერსტედ რასმუსენი (Fast and Furious 9), აიშა ფაბიენ როსი, კრისტოფერ ჰივიუ (Game of Thrones) და მესია სიმსონი.

Game of Thrones-ის მაყურებლებისთვის კარგად ნაცნობი მსახიობი, კრისტოფერ ჰივიუ The Witcher-ის მეორე სეზონში ნიველენის როლში მოგვევლინება — დაწყევლილი კაცი, რომელიც ტყეში ცხოვრებს და ადგილობრივებს მონსტრი ჰგონიათ.

კრიტოფერ ჰივიუ ტორმუნდის როლში.

ფოტო: HBO

"პირველ სეზონზე მაყურებლების გამოხმაურებამ შოუში ახალი სახეების დამატებასთან დაკავშირებული სტანდარტი საოცრად აამაღლა, თუმცა მეორე სეზონისთვის მაინც იდეალური ხალხი შევარჩიეთ, ვინც ზუსტად შეესაბამება ამ სამყაროს გმირებს, რომელთა ისტორიებსაც ნიჭიერი რეჟისორების საშუალებით მალე ვიხილავთ ეკრანებზე", — განაცხადა შოუს პროდიუსერმა, ლორენ შმიდტმა.

მეორე სეზონის გადაღებაზე რამდენიმე რეჟისორი იმუშავებს ერთდროულად, მათ შორის Umbrella Academy-სა და The Punisher-ის რეჟისორი, სტივენ სურჯიკი.

ჯერჯერობით დანამდვილებით ცნობილი არ არის ზუსტი თარიღი, თუ როდის შედგება ახალი სეზონის პრემიერა, თუმცა გავრცელებული ინფორმაციის თანახმად, მისი ხილვა 2021 წლის იანვარში შეგვეძლება.