რამდენიმე წუთის წინ ოფიციალურად დადასტურდა, რომ საკულტო სიტკომი მეგობრები ეკრანებზე ბრუნდება, ოღონდ ამჯერად სპეციალური სატელევიზიო პროექტის სახით — ჯერჯერობით დანამდვილებით ცნობილი არ არის, ფილმი იქნება ეს თუ სერიალი.

10 სეზონის, 236 ეპიზოდისა და შოუს დასრულებიდან 16 წლის შემდეგ ამჟამად უცნობი სახელწოდებისა და სცენარის მქონე სპინოფზე მუშაობენ, თუმცა ის დანამდვილებით ვიცით, რომ ახალ პროექტში კვლავ ვიხილავთ ყველასთვის საყვარელ მსახიობებს: ჯენიფერ ენისტონს, კორტნი კოქსს, ლიზა კუდროუს, მეთ ლებლანკს, მეთიუ პერისა და დევიდ შვიმერს.

შოუს ერთგვარ გაგრძელებაზე WarnerMedia მუშაობს და მას ახალ სტრიმინგ სერვისზე — HBO Max-ზე ვიხილავთ. აღსანიშნავია, რომ გასულ წელს ნეტფლიქსის შემდეგ სწორედ ამ სტრიმინგ სერვისმა იყიდა ამერიკაში სერიალის უფლებები $425 მილიონად.

ახალ პროექტზე კვლავ სერიალის შემქმნელები მუშაობენ: კევინ ბრაიტი, მარტა კაუფმანი და დევიდ კრეინი.

ამის შესახებ ინფორმაცია მსახიობებმა თავიანთ ინსტრაგრამის გვერდებზეც დაადასტურეს:

როგორც ჩანს, ისინიც მოუთმენლად ელიან ეკრანებზე დაბრუნებას.

გავრცელებული ინფორმაციის თანახმად, მომავალ პროექტში მონაწილეობისათვის თითოეულ მსახიობს 3-დან 4 მილიონამდე დოლარს გადაუხდიან.

მედიაში წლების განმავლობაში არაერთხელ გავრცელებული ჭორის შემდეგ, როგორც იქნა, სატელევიზიო ისტორიაში ერთ-ერთი ყველაზე პოპულარული სერიალის გმირები ეკრანზე ამჯერად ნამდვილად დაბრუნდებიან.

მეგობრების გამოსვლიდან 25 წლის შემდეგ ამაზე უკეთეს სიურპრიზს ვინ ინატრებდა?