თურქმენეთის ხელისუფლება მასწავლებლებს ავალდებულებს, რომ ერთნაირი — მწვანე ფერის ბლოკნოტები და კალმები გამოიყენონ. ინფორმაციას ამის შესახებ რადიო თავისუფლების თურქმენების სამსახური ავრცელებს.

როგორც გამოცემა წერს, რამდენიმე სკოლას დაავალეს, რომ თურქმენული ხალიჩის ორნამენტებით მწვანე კალმები და ერთნაირი მწვანე ბლოკნოტები შეიძინონ. აღნიშნული კალმები ქვეყანაში ყველაზე ძვირია, რადგან მათ რუსეთში, თურქეთსა და ჩინეთში სპეციალური შეკვეთით ამზადებენ.

მწვანე კალმები და ბლოკნოტები საჭიროა იმისთვის, რომ შეხვედრების დროს პედაგოგებმა ჩანაწერები გააკეთონ. თურქმენული ტელევიზიის რეპორტაჟების მიხედვით, ჩანაწერების გაკეთების ტრადიციას პრეზიდენტ გურბანგული ბერდიმუჰამედოვის სხდომების დროს ჩაეყარა საფუძველი. მისი გამოსვლების დროს მინისტრები და თანამდებობის პირები ბლოკნოტში რაღაცებს იწერენ.

გამოცემა თურქმენეთის ქრონიკების ინფორმაციით, თეთრი და მწვანე გურბანგული ბერდიმუჰამედოვის საყვარელი ფერებია. მას ყვავილებს მწვანე შეფუთვით ჩუქნიან, გარდა ამისა, ის მწვანე ფერის სპორტულ ტანსაცმელს ატარებს და ამავე ფერის ველოსიპედით სეირნობს.

თურქმენეთში საგანმანათლებლო დაწესებულებების თანამშრომლების ფორმა მკაცრად კონტროლდება. კაც პედაგოგებს მოეთხოვებათ, რომ ტრადიციული თავსაბურავი ატარონ, ხოლო ქალები ეროვნულ კაბებს იცვამენ.