რუსეთის საგარეო საქმეთა მინისტრის მოადგილემ, ანდრეი რუდენკომ საქართველოსთან ავიამიმოსვლის განახლების პირობები დაასახელა. გამოცემა RIA-სთვის მიცემულ ინტერვიუში, რუდენკო ამბობს, რომ ერთ-ერთი პირობა ე.წ. რუსოფობიის გაქრობაა.

"გაუქმებაზე საუბარი მხოლოდ მას შემდეგ იქნება შესაძლებელი, რაც ამისთვის აუცილებელი პირობები იქნება შექმნილი. პირველ რიგში საუბარია საქართველოში სიტუაციის დასტაბილურებაზე, რუსოფობიური კამპანიის დასრულებასა და ჩვენი მოქალაქეებისთვის რაიმე საფრთხის გაქრობაზე", — აღნიშნა რუდენკომ.

რაც შეეხება საქართველოს მოქალაქეებისთვის ვიზების გაუქმებას, რუდენკო აღნიშნავს, რომ საკითხი ორი ქვეყნის დღის წესრიგში არ დგას. მისივე თქმით, რუსეთი მზად იქნება თემას დაუბრუნდეს მას შემდეგ, რაც წინა წლის "მოვლენების ნეგატიური შედეგები" იქნება დაძლეული.

რუსეთმა საქართველოს "ტურისტული ემბარგო" 20 ივნისის მოვლენების შემდეგ დაუწესა. ამ დღეს საქართველოში მოქალაქეების პროტესტი საქართველოში რუსი დეპუტატების ჩამოსვლას მოჰყვა. მართლმადიდებლობის საპარლამენტთაშორისო ასამბლეის წაყვანის დროს სერგეი გავრილოვი საქართველოს პარლამენტის თავმჯდომარის სკამზე იჯდა, რასაც ოპოზიციისა და სამოქალაქო სექტორის მხრიდან პროტესტი მოჰყვა. ოპოზიციის წევრები პლენარულ სხდომათა დარბაზში შევიდნენ და თავმჯდომარის ადგილი დაიკავეს, გავრილოვს კი დარბაზში შესვლის უფლებას არ აძლევდნენ. ისინი ამბობდნენ, რომ თავმჯდომარის ადგილას ოკუპანტი ქვეყნის დეპუტატი, რომელმაც აფხაზეთი და ცხინვალი დამოუკიდებელ ქვეყნებად აღიარა, არ უნდა იჯდეს.

საბოლოოდ, ასამბლეის სესია შეწყდა და რუსმა დეპუტატებმა ქვეყანა დატოვეს. გავრილოვის მიერ სკამის დაკავებას საპროტესტო ტალღა მოჰყვა. სამართალდამცავებმა მოქალაქეების წინააღმდეგ რეზინის ტყვიები, ცრემლსადენი გაზი და წყლის ჭავლი გამოიყენეს.