9 თებერვალს ლოს ანჯელესში გამართულ ოსკარების დაჯილდოების 92-ე ცერემონიაზე 45 წლის ამერიკელ მსახიობს, ხოაკინ ფენიქსს ტოდ ფილიპსის ფილმ Joker-ში შესრულებული როლისთვის ოსკარი გადაეცა.

ჯილდოს მისაღებად სცენაზე ასულმა მსახიობმა ემოციური სიტყვა წარმოთქვა:

"თავს არცერთ სხვა ნომინანტზე ან ამ ოთახში მყოფ ადამიანზე აღმატებულად არ ვგრძნობ, რადგან ჩვენ ყველანი კინოს საერთო სიყვარულს ვიზიარებთ. ხოლო კინოს სიყვარულმა და გამოხატვის ამ ფორმამ მომცა ყველაზე შესანიშნავი გამოცდილება და არც კი ვიცი, ვინ ვიქნებოდი ამის გარეშე".

ფენიქსი ტრადიციულად პოლიტიკურ და სოციალურ თემებს შეეხო და რასიზმის, ცხოველების უფლებებისა და უთანასწორობის პრობლემებზე ისაუბრა:

"ვფიქრობ, რომ ყველაზე დიდი საჩუქარი, რაც ამ ყველაფერმა მე და ბევრ სხვა აქ მყოფთაგანს მოგვცა, არის შესაძლებლობა, რომ ხმა ავიმაღლოთ იმათთვის, ვისაც ეს შესაძლებლობა არ აქვთ. როცა ჩვენ ვსაუბრობთ გენდერულ უთანასწორობაზე, რასიზმზე, ქვიარ უფლებებზე, აბორიგენი მოსახლეობის უფლებებსა თუ ცხოველების უფლებებზე, ჩვენ ვებრძვით იმ წარმოდგენას, რომ ერთ ერს, ერთ რასას, ერთ გენდერს ან ერთ სახეობას აქვს უფლება დაუსჯელად დომონირებდეს, აკონტროლებდეს, იყენებდეს ან ექსპლუაატაციას უწევდეს სხვას. ვფიქრობ, ჩვენ ბუნებას ძალიან დავშორდით და ბევრი ჩვენგანის დანაშაული სამყაროს ეგოცენტრული წარმოდგენაა — გვგონია, რომ სამყაროს ცენტრი ჩვენ ვართ".

ხოაკინ ფენიქსმა, რომელიც ვეგანი და გარემოს ცნობილი დამცველია, ამჯერადაც კრიტიკულად ისაუბრა ცხოველების უფლებებზე:

"ჩვენ ვიჭრებით ბუნებაში და ვძარცვავთ მას თავისი რესურსების გამო. თავს უფლებას ვაძლევთ, რომ ხელოვნურად გავანაყოფიეროთ ძროხა და მშობიარობის შემდეგ ხბო წავართვათ. მიუხედავად იმისა, რომ მის ტანჯვაში ეჭვი არ გვეპარება, ხბოსთვის განკუთვნილ რძესაც ვიპარავთ და ყავას ან ბურღულეულს ვამატებთ. მგონია, რომ პიროვნული ცვლილების გვეშინია, რადგან ვფიქრობთ, რომ ეს მსხვერპლშეწირვა აუცილებელი იყო. თუმცა ადამიანები იმდენად გამჭრიახები, შემოქმედითები და გონებამახვილები ვართ, რომ თუ სიყვარულსა და თანაგრძნობას მთავარ სამოქმედო პრინციპებად დავისახავთ, ჩვენ შეგვეძლება ისეთი სისტემის შექმნა, განვითარება და მართვა, რომელიც სასიკეთო იქნება ყველა მოწყვლადი არსებისა და მთლიანად გარემოსთვის".

მსახიობმა თავის პირად გამოცდილებაზეც ისაუბრა:

"მთელი ცხოვრება არამზადა ვიყავი. ეგოისტი და ულმობელიც ვყოფილვარ. ახლა კი ბევრი თქვენგანის მადლობელი ვარ, რომ მეორე შანსი მომეცით. საუკეთესო, რისი გაკეთებაც შეგვიძლია, ერთმანეთის მხარდაჭერაა, როცა ხელს არ ვკრავთ წარსული შეცდომების გამო და ერთმანეთს ვეხმარებით. ამ გზით კი ერთმანეთის ვიხსნით და ვქმნით კაცობრიობის საუკეთესო სახეს".

ხოაკინ ფენიქსმა თავისი გამოსვლა გარდაცვლილი ძმის სიტყვებით დაასრულა:

"როცა 17 წლის იყო, ჩემმა ძმამ სიმღერისთვის ეს ტექსტი დაწერა: "გადასარჩენად სიყვარულით გაიქეცი და მშვიდობაც თან გამოგყვება". დიდი მადლობა".

იხილეთ დაჯილდოებაზე მისი გამოსვლა სრულად: