მიხეილ სააკაშვილის თქმით, ვანო მერაბიშვილის ადგილზე ციხიდან გამოსვლის შემდეგ ოჯახს დაუბრუნდებოდა, იმოგზაურებდა და რაიმე გადაწყვეტილებას მხოლოდ რაღაც დროის გასვლის შემდეგ მიიღებდა. ამის შესახებ სააკაშვილმა გადაცემა მთავარ აქცენტებში ისაუბრა.

საქართველოს ყოფილ პრეზიდენტს ჰკითხეს, იქნებოდა თუ არა ყოფილი პრემიერ-მინისტრი, ვანო მერაბიშვილი მის ახალ შტაბში, რომლის გახსნასაც ის საპრეზიდენტო ბიბლიოთეკაში აპირებს.

როგორც სააკაშვილი ამბობს, ის მერაბიშვილის მიმართ ვალდებულებას გრძნობს, თუმცა ხედავს მის მიერ და სისტემის მიერ დაშვებულ შეცდომებსაც.

"როდესაც ვანო ჩასვეს ციხეში, იმის მერე მსოფლიო შეიცვალა. მაგალითად ვანო რომ ჩასვეს, აიფონები არ არსებობდა, იყო ნოკიები. ვანო რომ ჩასვეს, არ იყო უბერი. მსოფლიო იყო სხვა. მე რომ ვანოს ადგილზე ვიყო, დავუბრუნდებოდი ჩემს ოჯახს, დავტკბებოდი შვილებთან ახლოს ყოფნით, ვიმოგზაურებდი მსოფლიოში, გავახელდი თვალებს, გავიხედ-გამოვიხედებდი და მხოლოდ რაღაც პერიოდის შემდეგ მივიღებდი გადაწყვეტილებას", — განაცხადა მიხეილ სააკაშვილმა.

ყოფილი შინაგან საქმეთა მინისტრი და ყოფილი პრემიერი, ვანო მერაბიშვილი მატროსოვის 20 თებერვალს დატოვებს. იგი 2013 წლის მაისში დააკავეს მითვისება-გაფლანგვისა და ამომრჩევლის მოსყიდვის ბრალდებით. მოგვიანებით, მას სხვა ბრალდებებიც წაუყენეს — 2011 წლის 26 მაისის აქციისა და სანდრო გირგვლიანის მკვლელობის საქმეებზე უფლებამოსილების გადამეტების მუხლებით. მერაბიშვილი 2014 წელს სასამართლომ დამნაშავედ სცნო და პატიმრობა მიუსაჯა.