გერმანიის კანცლერმა, ანგელა მერკელმა გაათავისუფლა მინისტრი, რომელმაც გამარჯვებისთვის შეაქო ლიბერალი კანდიდატი, რომელსაც ულტრამემარჯვენეები უჭერდნენ მხარს.

5 თებერვალს თავისუფალი დემოკრატიული პარტიის ლიდერი თომას კემერიხი თიურინგიაში ადგილობრივ პრემიერ-მინისტრად აირჩიეს. მას გამარჯვებაში ულტრამემარჯვენე პარტია ალტერნატივა გერმანიისთვის დაეხმარა. როგორც BBC წერს, კემერიხის გამარჯვებამ გერმანიაში "პოლიტიკური მიწისძვრა" გამოიწვია. გამარჯვებიდან მეორე დღესვე კი კემერიხმა გადადგომის შესახებ განაცხადა.

კრისტიან ჰირტემ, რომელიც აღმოსავლეთ ფედერალური მიწების საკითხებში გერმანიის სახელმწიფო მინისტრია თომას კემერიხს გამარჯვება ტვიტერით მიულოცა. ჰირტეს თქმით, მისი გამარჯვება თიურინგიის მოსახლეობის ნების გამოხატულებაა. ამის გამო პოლიტიკოსმა დიდი კრიტიკა დაიმსახურა, მათ შორის თავისი თანაპარტიელების მხრიდან.

ჰირტემ გათავისუფლების შესახებ ინფორმაცია 8 თებერვალს დაადასტურა:

"კანცლერმა მერკელმა მითხრა, რომ მე ვეღარ ვიქნები აღმოსავლეთ გერმანიის მიწების სახელმწიფო მინისტრი. ამიტომაც მე მას გადადგომის თხოვნით მივმართე".

როგორც BBC წერს, მეორე მსოფლიო ომის შემდეგ ეს პირველი შემთხვევაა, როდესაც ულტრამემარჯვენე პარტია რომელიმე ლიდერს გამარჯვებაში ეხმარება. სხვა ძირითადი პარტიები ალტერნატივა გერმანიასთან თანამშრომლობაზე ოფიციალურად უარს აცხადებენ.