მარნეულელი აქტივისტის, რაშან ზიადალიევის დაკავების გამო ოპოზიციის წარმომადგენლებმა და სხვა სამოქალაქო აქტივისტებმა საპროტესტო აქცია გამართეს. გავრცელებული ინფორმაციით, ზიადალიევი პოლიციამ გააჩერა და მას შემდეგ დააკავეს, რაც მან სამართალდამცავს მისთვის ფოტოს გადაღების უფლება არ მისცა.

თვითონ რაშან ზიადალიევი ამბობს, რომ მისი დაკავებით ადგილობრივ ხელისუფლებას სხვა აქტიური მოქალაქეების დაშინება სურს.

"მარნეულში არსებობს ასეთი სტერეოტიპი, რომ თუ შენ საუბრობ ადამიანის უფლებებზე, თუ შენ საუბრობ თავისუფლებასა და დემოკრატიაზე, შენ ვერ იქნები წარმატებული, რადგან ასეთი მაგალითი არ გვაქვს. მაგრამ ძალიან ბევრი მაგალითი გვაქვს მარნეულში, რომ თუ მუშაობ პოლიციაში, თვითმმართველობაში, სუს-ში, იქნები წარმატებული", — ამბობს ზიადალიევი მთავარ არხთან.

შინაგან საქმეთა სამინისტროში On.ge-ს უთხრეს რომ რაშან ზიადალიევი ადმინისტრაციულ სამართალდარღვევათა კოდექსის 173-ე მუხლით დააკავეს, რაც პოლიციელისადმი დაუმორჩილებლობას გულისხმობს.

მარნეულელმა აქტივისტმა პოლიციის შენობა 8 თებერვალს რამესვე დატოვა. სასამართლო პროცესი 10 თებერვალს გაიმართება.