ამ ბაბუინმა მეფე ლომიდან ცნობილი კადრი გააცოცხლა

1994 წელს გამოსული მეფე ლომი დისნეის ერთ-ერთი ყველაზე პოპულარული ანიმაციაა, რომელიც მთელ მსოფლიოში მილიონობით ადამიანს უყვარს.

შესაბამისად, ყველას ახსოვს ის ცნობილი სცენა, როცა რაფიკი შეკრებილ ცხოველებს პატარა სიმბას წარუდგენს.

შეიძლება დაუჯერებლად მოგეჩვენოთ, მაგრამ ზუსტად მსგავსი რამ ცოტა ხნის წინ სამხრეთ აფრიკის ეროვნულ პარკში განმეორდა.

ეს მოვლენა პარკის თანამშრომელმა, კურტ შულცმა აღბეჭდა კამერაზე: მამალმა ბაბუინმა ლომის ბოკვერი ხეზე აიყვანა. შულცის განცხადებით, ბაბუინი ბოკვერს შვილივით ექცეოდა.

"მამრი ბაბუინები თავის ნაშიერებს ხშირად ლოკავენ და ასე წმენდენ მათ ბეწვს. თუმცა ამ შემთხვევაში ლომის ბოკვერს ის ისე უვლიდა, როგორც დედალი ბაბუინი მოექცეოდა თავის შვილებს", — განაცხადა მან.

მისივე თქმით, ბოკვერს ცხელი ამინდის გამო გაუწყლოების ნიშნები ემჩნეოდა და სავარაუდოდ, ხეზე იმიტომ აიყვანა, რომ ფოთლების ჩრდილში მზის მცხუნვარებისგან დაეცვა.

მართალია, მეფე ლომში რაფიკი სიმბას მიმართ კეთილგანწყობილია, თუმცა ბუნებაში ძირითადად ასე არ ხდება: ბაბუინები ხშირად კლავენ ლომის ბოკვერებს.

თავდაპირველად კურტ შულცსაც ეგონა, რომ ამ ბაბუინსაც დედისგან დროებით უყურადღებოდ დატოვებული ბოკვერის მოკვლა სურდა, თუმცა მოლოდინი არ გაუმართლდა: ბაბუინს არა თუ ბოკვერის მოკვლა, მისი დაზიანებაც კი არ უცდია.