ქართული ოცნების გენერალურმა მდივანმა, კახა კალაძემ, 2020 წლის არჩევნებში მმართველ პარტიას "საკონსტიტუციო უმრავლესობის მოპოვება" უწინასწარმეტყველა. მნიშვნელოვანი უპირატესობით გამარჯვებაზე ისაუბრა. მან დღეს, 7 თებერვალს ჟურნალისტებთან საუბრისას თქვა, რომ მხოლოდ ქართულ ოცნებას აქვს გამარჯვების შანსი:

"ერთადერთი პოლიტიკური პარტია, რომელსაც აქვს რეალურად გამარჯვების შანსი და შესაძლებლობა, მოიპოვოს მყარი უმრავლესობა პარლამენტში, ეს არის „ქართული ოცნება-დემოკრატიული საქართველო”, შეიძლება, საკონსტიტუციო უმრავლესობაც კი".

იმავეს ვარაუდობს ქართული ოცნების დეპუტატი, ირაკლი კობახიძეც. მისი თქმით, 2020 წლის არჩევნებში ქართულმა ოცნებამ მინიმუმ 2016 წლის არჩევნების შედეგი უნდა გაიმეოროს:

"არსებული მოცემულობა გვაძლევს იმის მტკიცების საშუალებას, რომ ქართული ოცნება დამაჯერებლად გაიმარჯვებს ამ არჩევნებშიც. 2016 წელს ყოველმა მეორე ამომრჩეველმა მოგვცა ხმა და მინიმუმ იგივე შედეგი უნდა გავიმეოროთ ამ არჩევნებშიც. ეს არის ჩვენი ამოცანა".

2016 წლის საპარლამენტო არჩევნებში ქართულმა ოცნებამ 48,7 პროცენტი მიიღო, რითაც პარლამენტში საკონსტიტუციო უმრავლესობა მოიპოვა. კობახიძემ მმართველი პარტიის შედეგების განმეორებაზე იმის ფონზე ისაუბრა, როცა კვლევებში ქართული ოცნების რეიტინგი ოპოზიციის საერთო რეიტინგს ჩამოუვარდება.