საქართველოს პარლამენტის თავმჯდომარის, არჩილ თალაკვაძის თქმით, ოპოზიციის ნაწილი ცდილობს საარჩევნო კამპანია ამერიკაში ჩაატაროს, მაშინ, როცა საქართველოში მხარდაჭერა არ აქვს. ეს განცხადება არჩილ თალაკვაძემ ამერიკაში კონგრესმენებთან შეხვედრის შემდეგ გააკეთა.

"ოპოზიციის ეს ნაწილი ცდილობს თავისი საარჩევნო კამპანია ჩაატაროს ვაშინგტონში მაშინ, როდესაც მას საზოგადოების და მოქალაქეების მხარდაჭერა არ აქვს საქართველოში. ეს ფაქტია, იკვეთება, რომ ისინი ქვეყნის იმიჯის დაზიანების ხარჯზე ცდილობენ, რომ აშშ-ს მხრიდან მიიღონ ისეთი მხარდაჭერა, რომელსაც ამერიკის მთავრობა არასდროს არ აკეთებს და არასდროს არ ერევა ის პირდაპირ საარჩევნო საკითხებში", — თქვა არჩილ თალაკვაძემ ჟურნალისტებთან საუბრისას.

პარლამენტის თავმჯდომარემ თქვა, რომ კონგრესმენების მხრიდან საქართველოსთან დაკავშირებით დიდი ნდობა და ოპტიმიზმი არსებობს. მისი თქმით, ქვეყნის სუვერენული არჩევანია როგორი საარჩევნო სისტემა ექნება.

საქართველოს დელეგაციის ვიზიტი აშშ-ში მას შემდეგ დაიგეგმა, რაც ბოლო თვეების განმავლობაში შტატებიდან ხელისუფლებამ რამდენიმე კრიტიკული წერილი მიიღო. წერილებში კრიტიკის მიზეზად ბოლოდროინდელ მოვლენები სახელდებოდა, რომლებმაც აშშ-სთან საერთო ღირებულებების არსებობაზე კითხვები გააჩინა. კონგრესმენები ამბობდნენ, რომ საქართველო პირველად განიხილებოდა უარყოფით შუქზე.

გაიგეთ მეტი კონგრესმენების წერილებზე: