თბილისის მერმის, კახა კალაძის თქმით, ე.წ. ელიავას ბაზრობის იმ ფორმით დარჩენა, რა ფორმითაც დღესაა მიუღებელია. მისი განცხადებით, ბაზრობის მფლობელებთან შეხვედრის შემდეგ მერიამ გადაწყვიტა, რომ შემუშავდება განაშენიანების რეგულირების გეგმა, რომლის ფარგლებში არსებული მდგომარეობა გამოსწორდება.

"მგონი, არავის არ მოგვწონს ელიავას ბაზრობის ფუნქციონირება იმ ფორმით, რა ფორმითაც ის დღეს ფუნქციონირებს. ეს წარმოადგენს სერიოზულ დისკომფორტს იქ მომუშავე ადამიანებისთვის და ასევე წარმოადგენს დისკომფორტს ყველა იმ ადამიანისთვის, რომელიც ყოველდღე მიდის სხვადასხვა კონკრეტული რაღაცის შესასყიდად", — განაცხადა კახა კალაძემ.

როგორც მერი ამბობს, ერთი წლის წინ შემუშავებულ გენგეგმაზე ელიავას ბაზრობის ზონას სავაჭრო ზონის სტატუსი შენარჩუნებული აქვს. კახა კალაძემ აღნიშნა, რომ ელიავას ბაზრობაზე მომუშავე ადამიანებს საქმიანობას არ შეუზღუდავენ.

"განაშენიანების რეგულირების გეგმაში, რომელიც უნდა გააკეთოს ჩვენმა ურბანულმა სამსახურმა, დეტალურად იქნება გაწერილი გზათა ქსელი, კომუნიკაციები, რეკრეაციული სივრცეები და სავაჭრო სივრცეების მოწყობის ერთიანი გეგმა".