ჯანდაცვის მინისტრის, ეკატერინე ტიკარაძის განცხადებით, ჩინეთში მყოფი საქართველოს მოქალაქეები, რომლებიც ევაკუაციას დათანხმდნენ თურქეთში ჩაფრინდებიან და საკარანტინო პერიოდს იქვე გაივლიან. მისი თქმით, თურქეთიდან უკვე გაფრინდა თვითმფრინავი, რომელიც მათ წამოიყვანს.

ტიკარაძის ინფორმაციით, ევაკუაციას ჩინეთში მყოფი საქართველოს 4 მოქალაქე დათანხმდა. გარდა ამისა, მისი თქმით, სამინისტროს რამდენიმე ქართველი დაუკავშირდა, რომელიც ტურისტულად იმყოფებოდა ჩინეთი, ამიტომ მათ გამოსაყვანად მოლაპარაკებები გრძელდება.

კორონავირუსის შედეგად გარდაცვლილთა რაოდენობა 213-მდე გაიზარდა. ამავე დროს, დაინფიცირებულთა რიცხვმა 9 692-ს მიაღწია, აქედან 90 ჩინეთს გარეთ, 19 ქვეყანაში დაფიქსირდა. ამის შესახებ ინფორმაცია დღეს, 31 იანვარს დაავადებათა კონტროლის ხელმძღვანელმა, ამირან გამყრელიძემ გაავრცელა.

გუშინ ჯანდაცვის მსოფლიო ორგანიზაციამ კორონავირუსის გამო საერთაშორისო საგანგებო მდგომარეობა გამოაცხადა. ბრიფინგზე ორგანიზაციის წარმომადგენლებმა განაცხადეს, რომ ვირუსი კვლავ განაგრძობს გავრცელებას, საგანგებო რეჟიმის გამოცხადების მთავარ მიზეზად კი იმ ქვეყნების დაცვა დასახელდა, რომლებიც შეიძლება კორონავირუსთან გამკლავება თავად ვერ შეძლონ.

მსოფლიო ჯანდაცვის ორგანიზაცია საერთაშორისო საგანგებო რეჟიმს განმარტავს როგორც გამორჩეულ შემთხვევას, რომლის დროსაც "დაავადების გლობალური გავრცელება სხვა ქვეყნებისთვის საზოგადოებრივი ჯანმრთელობისთვის რისკს წარმოადგენს" და, შესაძლოა, საჭიროებდეს "კოორდინირებულ საერთაშორისო საპასუხო ქმედებას".

გაიგეთ მეტი: