ყოფილი გენერალური პროკურორის, ირაკლი შოთაძის თანამდებობაზე მოსალოდნელი დაბრუნების წინააღმდეგ ისევ აქცია იმართება. აქციას მართავს ევროპული საქართველოს ახალგაზრდული ფრთა. ისინი დღეს, 31 იანვარს პროკურატურასთან შეიკრიბნენ.

აქციის მონაწილეებმა ადგილზე გაშალეს ბანერები წარწერით: "არა ხელის დაფარებას", "ბრალდებული ბრამდებელი", "შოთაძე გამყალბებელია". მათ ადგილზე გამართეს აქცია-პერფორმანსი, კერძოდ, პლასტმასის დანები დაყარეს პროკურატურასთან და თქვეს, რომ "ეს არის პროკურატურის დღევანდელი სახე".

ირაკლი შოთაძის გასაუბრება საპროკურორო საბჭოში 4 თებერვალს არის დაგეგმილი. აქციის მონაწილეებმა ამ დღეს ფართომასშტაბიანი პროტესტი დააანონსეს.

გენერალური პროკურორობის კანდიდატებთან გასაუბრება 27 იანვარს დაიწყო. ევროპული საქართველოს დეპუტატი, ოთო კახიძე აცხადებს, რომ "ივანიშვილის პროკურატურაში მორიგი სპექტაკლი იწყება". ის აცხადებს, რომ ირაკლი შოთაძეს კრიტიკულ კითხვებზე პასუხის გაცემა მოუწევს. პარლამენტში იურიდიულ საკითხთა კომიტეტის თავმჯდომარე, ანრი ოხანაშვილი ამბობს, რომ გენერალური პროკურორის შერჩევის პროცედურები გამჭვირვალეა.

გენერალური პროკურორის თანამდებობა ვაკანტური მას შემდეგ გახდა, რაც მოქმედი გენერალური პროკურორი შალვა თადუმაძე უზენაესი სასამართლოს უვადო მოსამართლედ დაინიშნა.

ოპოზიციისა და სამოქალაქო საზოგადოების კრიტიკა გამოიწვია შოთაძის კანდიდატურამ, რომელმაც თანამდებობა 2018 წელს, მას შემდეგ დატოვა, რაც თბილისის საქალაქო სასამართლოს გადაწყვეტილებით ხორავას ქუჩის საქმეზე არასრულწლოვანი დავით სარალიძის მკვლელი ვერ გამოვლინდა და საპროტესტო აქცია დაიწყო. შოთაძის გადადგომას მოკლულის მამა ზაზა სარალიძე და მისი მხარდამჭერები ითხოვდნენ.

პროკურატურიდან წასვლის შემდეგ შოთაძე ტექნიკურ უნივერსიტეტში საერთაშორისო სამართლის ფაკულტეტის მიწვეულ ასოცირებულ პროფესორად მუშაობდა. გარდა ამისა, ის სილქნეტის იურიდიული კონსულტანტი იყო.

არასამთავრობოები მოუწოდებენ საპროკურორო საბჭოს, ირაკლი შოთაძის კანდიდატურას მხარი არ დაუჭირონ.