რამდენიმე არასამთავრობო ორგანიზაცია აცხადებს, რომ გზებზე განთავსებული ე.წ. ჭკვიანი კამერები პროგრამულად გაუმართავია, რითაც საფრთხე ექმნება ტექ-ინსპექტირების რეფორმას. ხელმომწერი ორგანიზაციები ავტოსაგზაო შემთხვევების საგანგაშო სტატისტიკის ფონზე, შინაგან საქმეთა სამინისტროს დაუყოვნებლივი რეაგირებისკენ მოუწოდებენ.

მათი თქმით, გადაამოწმეს ინფორმაცია, ფუნქციონირებს თუ არა საქართველოს გზებზე განთავსებული კამერები. საქართველოს ტრანსპორტისა და გზების ასოციაციამ მონიტორინგისთვის შეარჩია შემდეგი მუნიციპალიტეტები: რუსთავი, მარნეული, ბოლნისი, თელავი, გურჯაანი, საგარეჯო, წნორი, გორი, თერჯოლა, ქუთაისი, წყალტუბო, ზუგდიდი, ჩხოროწყუ, ახალციხე, ბათუმი.

"საქართველოს მუნიციპალიტეტებში ყველა კამერასთან იმოძრავა სხვადასხვა ავტომობილმა (სხვადასხვა სანომრე ნიშნით), რომელთაც პერიოდული ტექ-ინსპექტირების გავლის ვადა უკვე ამოწურული (გადაცილებული) ჰქონდათ და კანონით მათზე უნდა გატარებულიყო ადმინისტრაციულ სამართალდარღვევათა კოდექსის 118-ე მუხლი გათვალისწინებული სანქცია. არცერთ შემთხვევაში, არცერთ მუნიციპალიტეტში კამერების მიერ დარღვევაზე რეაგირება არ მომხდარა, რითაც გავრცელებული ინფორმაცია კამერების პროგრამული გაუმართაობის შესახებ დადასტურდა", — წერია არასამთავრობოების განცხადებაში.

არასამთავრობოები გამოთქვამენ ეჭვს, რომ კამერების მიერ, შესაძლოა, არ ხდება სრულფასოვანი რეაგირება სხვა დარღვევებზეც: წითელ შუქნიშანზე გავლა, ორმაგი ღერძულა ხაზის გადაკვეთა, მოძრაობის საწინააღმდეგო მიმართულებით გადაადგილება.

ბოლო თვეების განმავლობაში ინსპექტირების ცენტრებში მომხმარებელთა მიმართვიანობამ თითქმის 40 პროცენტით იკლო. 2019 წელს 500-მდე მოქალაქე დაიღუპა საგზაო-სატრანსპორტო შემთხვევების დროს, ხოლო 8 000-მდე დაშავდა/დასახიჩრდა.

ხელმომწერი ორგანიზაციებია:

  • საქართველოს ტრანსპორტისა და გზების ასოციაცია — დავით მესხიშვილი;
  • საქართველოს ალიანსი უსაფრთხო გზებისთვის — ეკა ლალიაშვილი;
  • ფონდი პარტნიორობა საგზაო უსაფრთხოებისთვის — ირაკლი იზორია;
  • ჰაბ-ჯორჯია — ვასო ურუშაძე;
  • ურბანული ლაბორატორია — გიორგი ბაბუნაშვილო;
  • ჩემი ქალაქი მკლავს — გიორგი ჯაფარიძე