ნობელის პრემიის კომიტეტმა ალბათ შვებით ამოისუნთქა, რადგან ბოლოს და ბოლოს ამერიკელმა მუსიკოსმა ლიტერატურაში მიღებული პრემიის შესახებ შეიტყო.

"ბობ დილანის თქმით, ნობელის ჯილდომ ის სიტყვების გარეშე დატოვა" - ამბობს ნობელის პრემიის კომიტეტი თავის განცხადებაში.

თუმცა, ჯერ კიდევ გადაწყვეტილი არაა, გამოცხადდება თუ არა დეკემბერში გამართულ ნობელის დაჯილდოების ცერემონიაზე ბობ დილანი.

ტელეგრაფისთვის მიცემულ ექსკლუზიურ ინტერვიუში ბობ დილანი თავის განცდებს "ვრცლად" აღწერს:

"ჩემთვის ეს რთულად დაუჯერებელი იყო. საოცარი და წარმოუდგენელი. ვინ არ ოცნებობს ამაზე?"

ჟურნალისტი ედნა განდერსენი წერს, რომ დილანი სავსებით ნასიამოვნები ჩანდა თავისი ჯილდოთი. კითხვაზე, გეგმავს თუ არა დეკემბერში გამართულ ცერემონიაზე გამოცხადებას, დილანი მოკლედ პასუხობს:

"ნამდვილად, თუკი ეს შესაძლებელი იქნება".

ნობელი ლიტერატურაში

13 ოქტომბერს ნობელის პრიზის მფლობელი ლიტერატურაში ამერიკელი მუსიკოსი, პოეტი და მწერალი ბობ დილანი გახდა.

მან ჯილდო "ამერიკული სიმღერის ტრადიციაში ახალი პოეტური გამოხატულების შექმნის" დამსახურებისთვის მიიღო.

დილანის დუმილი

17 ოქტომბერს, ნობელის კომიტეტის წარმომადგენელმა სარა დანიუსმა განაცხადა, რომ დილანი არ პასუხობდა ნობელის კომიტეტის წარმომადგენლების სატელეფონო ზარებსა თუ იმეილებს.

რამდენიმე დღიანი უშედეგო მცდელობის შემდეგ, კომიტეტმა "დილანის კარზე კაკუნი" შეწყვიტა:

"ჩვენ აღარაფერს ვაკეთებთ. მე დავურეკე და გავუგზავნე იმეილები მის უახლოეს თანამშრომელს და მივიღე მეგობრული პასუხები. ამ დროისთვის ეს სრულიად საკმარისია. არ ვნერვიულობ. მე ვფიქრობ, რომ გამოჩნდება".

დაჯილდოება

ნობელის პრემიის დაჯილდოების ცერემონია 10 დეკემბერს სტოკჰოლმში გაიმართება, სადაც გამარჯვებულს შვედეთის მეფე კარლ XVI გუსტავი 750 000 გირვანქა სტერლინგს გადასცემს.

ცერემონიაზე ბობ დილანი და კიდევ 10 ლაურეატი მიიღებენ ნობელის მედალს, ნობელის დიპლომსა და დოკუმენტს ასევეშვედეთის მეფე კარლ XVI გუსტავისგან.