ოსკაროსანმა კინორეჟისორმა გასულ წელს ახალი დოკუმენტური ფილმი გადაიღო, რომელიც აშშ-ში მცხოვრები ემიგრანტი იტალიელი მუსიკოსების შესახებ მოგვითხრობს.

ფილმიThe Oratorio, რომლის პრემიერაც დღეს, 23 იანვარს სანტა ბარბარას ფესტივალზე შედგება, ჩვენთვის კიდევ უფრო საინტერესოა, რადგან მასში მონაწილეობას ქართველი საოპერო მომღერალი სალომე ჯიქია იღებს.

"ფილმში ჩემი აგენტისა და იტალიური მხარის მეშვეობით მოვხვდი. კალიარის საოპერო თეატრში ამ პროექტის ფარგლებში სპეციფიური სოპრანო სჭირდებოდათ, რომელიც მეცო სოპრანოსა და სოპრანოს პარტიას თავისუფლად შეასრულებდა. არჩევანი კი ჩემზე შეაჩერეს", — ამბობს სალომე On.ge-სთან საუბრისას.

გადაღებები ნაწილობრივ სწორედ იტალიაში, კალიარის საოპერო თეატრში მიმდინარეობდა და ნიუ-იორკში, სან პატრიკის ეკლესიაში დასრულდა.

დოკუმენტური ფილმი სწორედ სან პატრიკის ეკლესიის ირგვლივ ვითარდება, სადაც ამერიკელ მსმენელს 200 წლის წინ მარია მალიბრანის შესრულებით პირველად გააცნეს იტალიური საოპერო მუსიკა.