თბილისის საქალაქო სასმართლოში, სადაც ხორავას ქუჩაზე მომხდარი მკვლელობის საქმეზე მირზა სუბელიანს შვილს კითხავდნენ, ზაზა სარალიძესა და მიხეილ კალანდიას ოჯახის წევრებს შორის დაპირისპირება მოხდა. სხდომაზე გადაღებულ კადრებში ჩანს, რომ სარალიძე ბრალდებულის დაკითხვის დროს ღიზიანდება და პროტესტის ნიშნად დარბაზს ტოვებს, რა დროსაც მას მიხეილ კალანდიას მამა, თენგიზ კალანდია აგინებს.

ბრალდებულის მამა აპირებს, რომ სარალიძეს გაყვეს, თუმცა მანდატური მას დარბაზში დარჩენისკენ მოუწოდებს. მალევე დარბაზიდან გარბის ლუკა კალანდია და მამამისი მისდევს. მანდატურები მათ შეჩერებას ცდილობდნენ, თუმცა ვერ შეძლეს და დაპირისპირებისას სხდომათა დარბაზის კარი ჩამოვარდა.

ხმაური დერეფანში გაგრძელდა, სადაც კალანდიას ოჯახის წევრები ზაზა სარალიძეს აგინებდნენ და მას საქმით სპეკულაციაში ადანაშაულებდნენ. მანდატურებმა ლუკა და თენგიზ კალანდიებს სასამართლოს შენობა დაატოვებინეს. ჟურნალისტებთან საუბრისას ლუკა კალანდიამ განაცხადა, რომ ისინი ორი წელი დუმდნენ, მაგრამ დღეიდან აპირებენ, რომ ყველას საკადრისი პასუხი გასცენ.

მიხეილ კალანდია 2017 წლის პირველ დეკემბერს ხორავას ქუჩაზე მოზარდებს შორის მომხდარი კონფლიქტის ერთ-ერთი მონაწილეა. კალანდიამ გამოძიებისა და სასამართლო პროცესის დროს ჩვენება არაერთხელ შეცვალა. ზაზა სარალიძე ამტკციებდა, რომ ის მისი შვილის მკვლელობაში მონაწილეობდა და გამოძიება მას ხელს აფარებდა.

კალანდია დავით სარალიძის ჯგუფურად, დამამძიმებელ გარემოებაში მკვლელობის ბრალდებით თითქმის 3 წლის შემდეგ, 2020 წლის 4 ივნისს დააკავეს. შინაგან საქმეთა სამინისტროში განაცხადეს, რომ პირველი ინსტანციის განაჩენის შემდეგ მათ მოიპოვეს მტკიცებულებები, რომლებიც მკვლელობაში კალანდიას თანამონაწილეობის ეჭვს ამყარებდა.