პარტია ევროპული საქართველოსა და ნაციონალური მოძრაობის დეპუტატები საპარლამენტო მუშაობაში მონაწილეობას კვლავ არ მიიღებენ. ორივე პარტიაში აცხადებენ, რომ ბოიკოტის რეჟიმი მომდევნო სხდომებზეც, საგაზაფხულო სესიებზეც გაგრძელდება, მანამ, სანამ მათი მოთხოვნა საარჩევნო სისტემაზე, არ დაკმაყოფილდება.

ოპოზიციურმა პარტიებმა პროპორციულ საარჩევნო სისტემაზე გადასვლის მოთხოვნით ბოიკოტი გამოაცხადეს. მათ არ მიიღეს მონაწილეობა არც 17 იანვრის რიგგარეშე სესიაში.

პროპორციულის ჩავარდნა, პროტესტი და პოლიტიკური დაპირისპირება — მოკლედ

მას შემდეგ, რაც ქართული ოცნების ე.წ. აჯანყებულმა დეპუტატებმა ჩააგდეს საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო, ოპოზიციისა და სამოქალაქო აქტივისტების საერთო პროტესტი დაიწყო. დაპირისპირებული ოპოზიციური ჯგუფები ერთი მოთხოვნის ირგვლივ გააერთიადნენ — ვადამდელი არჩევნების პროპორციული სისტემითა და ე.წ. გერმანული მოდელით ჩატარება.

პროტესტის ფარგლებში პიკეტირებული იყო მთავარი საკანონმდებლო ორგანო, რომლის შესასვლელებიც ხელისუფლებამ ორჯერ სპეცრაზმისა და წყლის ჭავლის გამოყენებით გახსნა.

აქციებმა მაჟორიტარი დეპუტატებისა და ოცნების ოფისთან გადაინაცვლა, სადაც აქტივისტებს მმართველი გუნდის მხარდამჭერები ხვდებოდნენ და ფიზიკურად უსწორდებოდნენ. გარდა ამისა, განახლდა საპროტესტო მოძრაობა "არა ნაცებს" და გაიმართა აქციები სახელად "დემიშიზაცია", რომელთა წევრები ნაციონალური მოძრაობის ოფისებს კვერცხებს და ცოცხებს ესროდნენ, მხარდამჭერებსა და აქტივისტებს კი ფიზიკურად უსწორდებოდნენ.