ნაციონალური მოძრაობის ერთ-ერთი ლიდერი, რომან გოცირიძე ამბობს, რომ პარლამენტში ნიკა მელიას ადგილმონაცვლის არჩევა პროცედურული ვალდებულებაა. როგორც On.ge-ს გოცირიძემ განუცხადა, ნაციონალურ მოძრაობას უპასუხისმგებლობაში ადანაშაულებენ, რადგან ოპოზიციის პარლმანეტში "შეტყუება" სურთ.

"ოპოზიცია არის ბოიკოტის მდგომარეობაში. ბოიკოტი არის დეპუტატების და ფრაქციების კანონიერი უფლება. პარლამენტს აქვს ვალდებულება აუცილებლად დაამტკიცოს ის დეპუტატი, რომელიც აირჩია ხალხმა. ეს არის პროცედურული ვალდებულება. ამ შემთხვევაში უნდა შეასრულონ ეს ფორმალური მხარე. როდესაც ისინი ამას აბამენ ოპოზიციის ბოიკოტზე, ამით მათ უნდათ, რომ ოპოზიცია გამოიყვანონ ბოიკოტის მდგომარეობიდან ", — განაცხადა გოცირიძემ.

რომან გოცირიძე ასევე გამოეხმაურა უმრავლესობის წევრების განცხადებებს, რომ ნაციონალურ მოძრაობას ნიკა მელიას ადგილმონაცვლედ ბადრი ბასიშვილის არჩევის "რცხვენია". მისი თქმით, ეს "სისულელეა"

"ნაციონალურმა მოძრაობამ წარდგინა ბადრი ბასიშვილი და რომ არ სდომოდა, მაშინ ჩაანაცვლებდა სიაში მომდევნოდ მყოფი ადამიანით", — განაცხადა გოცირიძემ.

დღეს, 17 იანვარს რიგგარეშე სხდომაზე პარტიული სიით მელიას ადგილმონაცვლის, ბადრი ბასიშვილის კანდიდატურა უნდა დაემტკიცებინათ, თუმცა ოპოზიცია ისევ ბოიკოტის რეჟიმში რჩება და პლენარულ სხდომებს არ ესწრება. ოცნების დეპუტატების ნაწილი აცხადებს, რომ თუ ენმ-ს საკუთარი თანაგუნდელისთვის მანდატის მინიჭება არ სურს, არც ისინი უნდა იყვნენ ვალდებულები კანდიდატს კენჭი უყარონ.

უმრავლესობის ლიდერები კრიტიკულად განწყობილ თანაგუნდელებს უხსნიან, რომ ისინი, როგორც პასუხისმგებლიანი პოლიტიკოსები, ვალდებული არიან მოვალეობა შეასრულონ და ენმ-ს არ დაემსგავსონ. საპროცედურო საკითხთა კომიტეტის თავმჯდომარე კი განმარტავს, რომ რეგლამენტის მიხედვით ვალდებულები არიან პირველ საკითხად დეპუტატის მანდატი განიხილონ და მანამდე სხვა საკითხებზე ვერ იმსჯელებენ.

ნაციონალური მოძრაობა და ზოგადად საპარლამენტო ოპოზიცია უკვე რამდენიმე თვეა რაც ბოიკოტის რეჟიმშია და პარლამენტის სხდომებს არ ესწრება მას შემდეგ, რაც პროპორციული საარჩევნო სისტემის კანონპროექტი ჩავარდა.