NDI-ს კვლევის მიხედვით, სასამართლოს საქმიანობას ბოლო 7 წლის განმავლობაში ყველაზე მაღალი უარყოფითი შეფასება აქვს.

ფოტო: NDI

მოსახლეობის 31% სასამართლოს საქმიანობას ცუდად, 14% კი ძალიან ცუდად აფასებს. სასამართლოს საქმიანობას კარგად მხოლოდ 9% აფასებს, ძალიან კარგად კი — 1%.

ბოლო ერთი წლის განმავლობაში სასამართლო სისტემაში განვითარებული მოვლენები ხმამაღალი განხილვის, უმრავლესობის დაშლისა და ქუჩის აქციების მიზეზი გახდა. უზენაესში უვადოდ დასამტკიცებელი მოსამართლეების სიამ სასამართლოში კლანური სისტემის არსებობასა და გავლენებზე საუბარს დაუდო საფუძველი. საბოლოოდ, ერთწლიანი დავის, არჩევის წესის ცვლილებებისა და ოპოზიციის ბოიკოტის მიუხედავად, ქართულმა ოცნებამ მაინც აირჩია უზენაესი სასამართლოს უვადო 10 მოსამართლე.

ეროვნულ დემოკრატიულმა ინსტიტუტმა (NDI) კვლევა 2019 წლის 19 ნოემბრიდან 13 დეკემბრის ჩათვლით ჩაატარა. საქართველოს მასშტაბით (ოკუპირებული ტერიტორიების გამოკლებით), 2 180 (გამოპასუხება 35) პირისპირ ინტერვიუს წარმომადგენლობითი შერჩევის საფუძველზე გამოიკითხა. საშუალო ცდომილების ზღვარი 1,9 პროცენტია.

NDI-ის კვლევები ხორციელდება დიდი ბრიტანეთის მთავრობის UK aid-ის ფინანსური ხელშეწყობით. გამოკითხვას ატარებს CRRC — საქართველო.