საერთაშორისო უფლებადამცველმა ორგანიზაციამ, Human Right Watch-მა, რომელიც მსოფლიოს ასამდე ქვეყანაში არსებულ ვითარებას აანალიზებს, ყოველწლიური ანგარიში გამოაქვეყნა. 2019 წელს საქართველოს შესახებ ანგარიშში ყურადღება გამახვილდა სამართალდამცავთა დაუსჯელობაზე, მედიაზე, პოლიტიკურ დაძაბულობაზე, შრომის კანონმდებლობის არასაკმარის რეგულაციებსა და მკაცრ ნარკოპოლიტიკაზე.

ანგარიშს გამოეხმაურნენ მმართველი გუნდშიც და ხელისუფლების მიმართ კრიტიკას კრიტიკითვე უპასუხეს. ქართული ოცნების წევრები Human Right Watch-ს შეფასებებს უწუნებდნენ და მეტი დაფიქრებისკენ მოუწოდებდნენ. მმართველი პარტიის წარმომადგენლები ორგანიზაციის კრიტიკაში ოპონენტების ხელწერას ხედავდნენ და მიიჩნევდნენ, რომ მაგალითად, 20 ივნისის აქციის დაშლის შეფასებისას ორგანიზაციას ნაადრევი დასკვნები ჰქონდა.

რატი იონათამიშვილი — უმრავლესობის წევრი

მსგავსი ანგარიშების შემუშავების დროს უფრო მეტი პასუხისმგებლობა უნდა გამოიჩინონ ავტორებმა და არ უნდა დაეყრდნონ მხოლოდ პოლიტიკურად მოტივირებული არასამთავრობო ორგანიზაციების შეხედულებებს. ამ ანგარიშში არის ურთიერთგამომრიცხავი ჩანაწერებიც. მაგალითად, თუ ერთ აბზაცში არის საუბარი იმაზე, რომ აქცია იყო მშვიდობიანი, მეორე მხრივ წერია, რომ 90-ზე მეტი სამართალდამცავი იყო დაშავებული.

მამუკა მდინარაძე — უმრავლესობის ლიდერი

წარმოდგენაც კი არ შეეძლებოდა, თუ ორი დღით ადრე, ვიდრე ეს დასკვნა გამოქვეყნდებოდა, საქართველოს ყოფილი პრეზიდენტი, მიხეილ სააკაშვილი პირდაპირ ეთერში აღიარებდა ხელისუფლების დამხობის მცდელობას. ეს ერთი და მეორე, მე მგონია, რომ საერთაშორისო ორგანიზაციებს კრიტიკულად მომავალში მოუწევთ თავიანთი წყაროების კარგად გადამოწმება იმიტომ, რომ ისეთ უხერხულ მდგომარეობაში არ ჩავარდნენ, რა მდგომარეობაშიც ვარდებიან.

ნინო წილოსანი — გარემოს დაცვის კომიტეტის თავმჯდომარე

ეს ანგარიში მომზადებულია აშკარად მანამ, სანამ საქართველოს ყოფილმა პრეზიდენტმა, მიხეილ სააკაშვილმა გააკეთა აღიარებითი ჩვენება, რომ 20 ივნისს ხელისუფლების დამხობის მცდელობა იყო და ფაქტობრივად, ასე ვთქვათ, ბეწვზე გადარჩა ხელისუფლება დამხობისგან. რა თქმა უნდა, The Human Right Watch, რომელიც განსაკუთრებით გამსჭვალულია კრიტიკული და შედარებით უარყოფითი ფაქტების გამოსავლენად, ამას ვერც კი წარმოიდგენდა.

რომან კაკულია — დარგობივი ეკონომოკის კომიტეტის თავმჯდომარე

არიან ისეთი ტიპის პოლიტიკოსები, რომლებიც საკუთარ თავს პოლიტიკოსებს უწოდებენ. საზოგადოებაში ავტორიტეტის დაბრუნებით კი არ ცდილობენ ხელისუფლებაში დაბრუნებას, არამედ ყველაფერს აკეთებენ იმისთვის, რომ ქვეყნის ხელისუფლების იმიჯი გაანულონ ნებისმიერი მეთოდებით. მე, სამწუხაროდ, ამ პრინციპს ვიცნობ.

ირაკლი სესიაშვილი — თავდაცვისა და უშიშროების კომიტეტის თავმჯდომარე

როგორც ხელისუფლების წარმომადგენელს, მინდა, ავტორიტეტული საერთაშორისო ორგანიზაციების მიმართ ნდობა მქონდეს. მათი მხრიდან კრიტიკა უნდა ეფუძნებოდეს სწორ, ობიექტურად შეფასებულ ფაქტებს და კრიტიკაც უნდა იყოს იმის შესაბამისი. როგორც წესი, ასეთი ორგანიზაციები ინფორმაციას იღებენ სხვადასხვა ადგილობრივი არასამთავრობო ორგანიზაციისგან. კარგად ვიცით, რომ ბევრი პოლიტიკური ტელევიზიებისგან ლობირებული არასამთავრობო სექტორი პირდაპირ მიბმულია პოლიტიკურ პარტიასთან და ისინი ფაქტობრივად მოქმედებენ იმ პოლიტიკური შეკვეთით, რაც მათ სურთ, რომ პოლიტიკური სარგებელი მიიღოს მისმა პატრონმა.