პარლამენტის ყოფილი თავმჯდომარე და უმრავლესობის წევრი, ირაკლი კობახიძე ეუთო/ოდირს უზენაესი სასამართლოს მოსამართლეთა არჩევის შესახებ დასკვნას უწუნებს. მისი თქმით, ოდირის დოკუმენტში უზუსტობებია.

"უხეში, ფაქტობრივი, ტექნიკური და შინაარსობრივი უზუსტობები არის გაპარული ამ დასკვნაში. მიზეზი რა არის არ ვიცი. ეს უკავშირდება ადგილობრივ თუ სხვა დამკვირვებლების კომპეტენციას, მიკერძოებას თუ ა.შ.", — განაცხადა კობახიძემ.

უზენაესი სასამართლოს მოსამართლეების დანიშვნის პროცესზე ეუთო/ოდირის ანგარიშში ნათქვამია, რომ გამოვლინდა რიგი დარღვევები. მათ შორის, ხაზგასმულია უშუალოდ საბოლოო დანიშვნის ეტაპი.

ასევე ანგარიშში მოხვდა მოსამართლეთა კვალიფიკაციის საკითხიც. როგორც დოკუმენტში ვკითხულობთ, რიგი კანდიდატები არ აკმაყოფილებდნენ მინიმალური იურიდიული განათლების მოთხოვნას. სამუშაო ჯგუფმა დაადასტურა ყველა კანდიდატის შესაბამისობა დიპლომების გადამოწმებამდე, თუმცა, გადამოწმებული ინფორმაცია არ გამოქვეყნებულა, რამაც შეასუსტა პროცესის გამჭვირვალობა და სამართლიანობა.