ჰილჰაუსის მოჩვენების მიერ გამოწვეული საერთო კმაყოფილების შემდეგ, როგორც ჩანს, ნეტფლიქსმა გადაწყვიტა კიდევ ერთი საშინელებათა ჟანრის სერიალი შეეთავაზებინა ერთგული მაყურებლებისთვის.

Locke & Key — ასე ჰქვია ახალ სატელევიზიო შოუს, რომელიც საშინელებათა ჟანრის საკულტო მწერლის, სტივენ კინგის შვილის, ჯო ჰილის ამავე სახელწოდების მქონე კომიქსის სერიის ეკრანიზაციაა.

სერიალის სიუჟეტი უცნაურ სახლში ვითარდება, რომელიც მთავარმა გმირებმა მემკვიდრეობით მიიღეს, მანამდე კი იქ საზარელი ტრაგედია დატრიალდა.

როგორც სულ ცოტა ხნის წინ გავრცელებული ტრეილერიდან ვიგებთ, სახლში მცხოვრები მოზარდები შემთხვევით აღმოაჩენენ საიდუმლო გასაღებს, რომელსაც მაგიური ძალა აქვს. სწორედ ამის შემდეგ იწყება ერთმანეთზე უფრო უცნაური მოვლენები.

სერიალში მთავარ როლებს დერბი სტენჩფილდი (Scandal), ჯეკსონ რობეტ სკოტი (It) და კონორ ჯესაპი (American Crime) ასრულებენ. აღსანიშნავია, რომ სერიალის შექმნაში მონაწილეობას თავად მწერალი ჯო ჰილი იღებდა, რომლის კომიქსებმაც არაერთი მნიშვნელოვანი ლიტერატურული ჯილდო და ამ ჟანრის მოყვარულების აღიარება დაიმსახურა.

ახალი ტრეილერი გარანტიას გვაძლევს, რომ წინ საოცრად სანახაობრივი და საშიში ისტორია გველოდება, რომელიც 10 ეპიზოდის განმავლობაში გაგრძელდება. თუ გავითვალისწინებთ იმასაც, რამდენად საინტერესო პროდუქტი გამოვიდა ჰილჰაუსის მოჩვენება, მაშინ ისღა დაგვრჩენია პრემიერის თარიღს — 7 თებერვალს მოუთმენლად დაველოდოთ.