ჯერ კიდევ ნოემბერში გავრცელდა ინფორმაცია, რომ Warner Bros აქტიურად აწარმოებდა მოლაპარაკებებს კოლინ ფარელთან, რათა ბეტმენის ახალ ფილმში ცნობილი ბოროტმოქმედის, პინგვინის როლი შეესრულებინა.

ერთ-ერთი ყველაზე ცნობილი სუპერგმირის — ბეტმენის შესახებ ახალ ფილმს გახმაურებული ბლოკბასტერის, მაიმუნების პლანეტის რეჟისორი, მეთ რივზი იღებს. სულ ცოტა ხნის წინ სწორედ რეჟისორმა ტვიტერის პირად ანგარიშზე გამოქვეყნებული პოსტით დაადასტურა, რომ მის ფილმში კოლინ ფარელსაც ვიხილავთ.

"მოიცა, ეს შენ ხარ? #Oz", — ამ წარწერით რეჟისორმა კოლინ ფარელის გიფი გამოაქვეყნა, სადაც #Oz იშიფრება, როგორც ოსვალდ კობლეპოტი, რაც ცნობილი ვილანის, პინგვინის ნამდვილი სახელია.

პინგვინი კომიქსების სამყაროსთვის კარგად ცნობილი ბოროტმოქმედია, რომელიც კინომოყვარულებს ტიმ ბარტონის 1992 წელს გადაღებული ფილმიდან Batman Returns ემახსოვრებათ, სადაც მის როლს დენი დე ვიტო ასრულებს.

ფოტო: Warner Bros. Pictures

იმ ფაქტს, რომ პინგვინის როლს ამჯერად ცნობილი ირლანდიელი მსახიობი, კოლინ ფარელი მოირგებს, დადებითად შეხვდა თავად დენი დე ვიტო:

"კოლინ ფარელი დიდებული მსახიობი და ასევე ჩემი კარგი მეგობარია. უკვე წლებია ვიცნობ მას და ვფიქრობ, შესანიშნავად შეასრულებს პინგვინის როლს".

როგორც უკვე ვიცით, ფილმში ბეტმენის როლს რობერტ პატინსონი ითამაშებს, რომელიც ამ როლს ძალიან სერიოზულად მოეკიდა: მისი თქმით, თუ ის ბეტმენის როლზე ჩაფლავდება, კარიერას პორნოში გააგრძელებს.

ჩვენთვის ასევე ცნობილია, რომ ფილმში ვიხილავთ ზოი კრავიცსაც, რომელიც ქალი-კატის როლს შეასრულებს და ასევე Westworld-ის მსახიობს, ჯეფრი რაითს, რომელიც გოთემის ცნობილი გამომძიებლის, ჯეიმს გორდონის როლს მოირგებს.