ახალ გუდაურში, რედკოს დასახლებაში მეოთხე დღეა წყალი არ მოდის. სხვადასხვა ტელეკომპანიასთან ტურისტები ამბობენ, რომ წყლის პრობლემის გამო გუდაურს ტოვებენ და ჯავშნებს აუქმებენ. გარდა ამისა, წყალი შეფერხებით მიეწოდება ბაკურიანის ქუჩებსაც.

ტელეკომპანია მთავართან ტურისტები ამბობენ, რომ ნომრებში წყალს ეზიდებიან და მინერალური წყლით ბანაობაც უწევთ:

"შესანიშნავი დღესასწაულები გვქონდა. ისეთი, რომელსაც არავის ვუსურვებ. ჩამოვედით და უკვე სამი დღეა უწყლოდ ვართ. გაზიანი ბორჯომით ვბანაობთ. ძალიან კარგად გავატარეთ დრო".

გაერთიანებული წყალმომარაგების კომპანია აცხადებს, რომ პრობლემა გუდაურში მშრალი კლიმატური პირობების გამო წყლის მარაგის შემცირებამ და სეზონზე გაზრდილი მოხმარების შედეგად წნევის ვარდნამ გამოიწვია. მათივე თქმით, ჯვრის უღელტეხილზე დამატებითი მარაგის შესაქმნელად შესაბამისი სამუშაოები მიმდინარეობს, რის შემდეგაც გუდაურის პრობლემა უნდა მოგვარდეს.

რაც შეეხება ბაკურიანს, კომპანიაში განმარტავენ, რომ რეზერვუარების შევსების შემდეგ დაბის ძირითად ნაწილს წყალი უკვე სტაბილურად მიეწოდება. დარჩენილ ორ, აღმაშენებლისა და წაქაძის ქუჩებზე აღდგენითი სამუშაოები მიმდინარეობს.