ჯანდაცვის მინისტრმა, ეკატერინე ტიკარაძემ რამდენიმე საათის წინ თქვა, რომ გრიპის ვირუსის ვაქციანაციას საჭიროდ არ მიიჩნევს. მინისტრის ამ განცხადებას გამოხმაურება მოჰყვა, რადგან ის ანტივაქსერულ მოწოდებად მიიჩნიეს.

დაავადებათა კონტროლის ცენტრის ხელმძღვანელმა, ამირან გამყრელიძემ On.ge-ს უთხრა, რომ მინისტრის განცხადების კონტექსტი სწორია და გრიპის ვირუსზე ვაქცინაცია სავალდებულო არაა, თუმცა "მკაცრად რეკომენდირებულია".

რა თქვა ჯანდაცვის მინისტრმა?

"ვაქცინა არ არის პანაცია და აქედან გამომდინარე მე არ ვთვლი, რომ ვაქცინაცია არის საჭირო გრიპის ვირუსზე. შესაბამისად, ამისთვის არ არის საჭირო ზედმეტი აქცენტების გაკეთება".

რას ამბობს დაავადებათა კონტროლის ცენტრი?

"სავალდებულო ვაქცინაციათა ჩამონათვალში გრიპის საწინააღმდეგო აცრა არ შედის. ეს არის სარეკომენდაციო. საქართველოს ეროვნულ კალენდარში გრიპის საწინააღმდეგო აცრა არ არის სავალდებულო ისე, როგორც არის: წითელას, წითურას, ტუბერკულიოზის და ა.შ. ეს არ არის სავლდებულო, მაგრამ არის მკაცრად სარეკომენდაციო".