სარა ჯესიკა პარკერი ამჟამად HBO-ს ახალ სერიალ განქორწინებაში მთავარ როლს ასრულებს, რომლის პრემიერაც ოქტომბრის დასაწყისში შედგა.

მიუხედავად იმისა, რომ სარა ამჯერად სხვა შოუშია, ის ვერც ახლა და სავარაუდოდ ვერც ვერასდროს აუვლის გვერდს შეკითხვებს ერთ-ერთი ყველაზე პოპულარული და საკულტო სერიალის სექსი დიდ ქალაქში შესახებ.

ამჯერადაც, Fame Focus-თან საუბრისას თქვა, რომ იდეა გადაიღონ სექსი დიდ ქალაქში 3 არსებობს და ის ერთ დღეს აუცილებლად იქცევა რეალობად.

"იცით, როდესაც მე ქერი ბრედშოუს ვთამაშობდი ეს ჩემთვის დიდი პრივილეგია იყო. წარმოიდგინეთ, შოუს თითო ეპიზოდს, მინიმუმ 10 მილიონი ადამიანი უყურებდა, ამიტომ თუნდაც მათთვის ღირს კიდევ ერთხელ შეიკრიბოს ნიუ-იორკული ოთხეული. ხომ გესმით რას ვამბობ? მე ვგრძნობ პასუხისმგებლობას მათ მიმართ და თითქმის ყოველდღე ვფიქრობ, რომ სერიალის ახალი სეზონი თუ არა, ფილმის კიდევ ერთი ნაწილი მაინც უნდა გავაკეთოთ", ამბობს სარა ჯესიკა პარკერი.