ამერიკის შეერთებული შტატების ინფორმაციით, ისლამური სახელმწიფოს ერთ-ერთი მეთაური დასავლეთ ერაყში, ანბარის პროვინციაში, აშშ-ს შეიარაღებულმა ძალებმა საჰაერო თავდასხმის შედეგად მოკლეს. ამის შესახებ რადიო თავისუფლება იუწყება.

პენტაგონის წარმომადგენლის, პიტერ კუკის განმარტებით, აბუ ვაჰიბს, სამ პირთან ერთად, 6 მაისს დაესხნენ თავს. მისი თქმით, აღნიშნული პირი იყო ალ-ქაიდას ყოფილი წევრი ერაყში და ბოლო დროს ის აისის ვიდეოებშიც გამოჩნდა.

ამ დრომდეც არაერთხელ ვრცელდებოდა ინფორმაცია იმის შესახებ, რომ ვაჰიბი შეიარაღებული თავდასხმების სამიზნე იყო. თუმცა, ეს პირველი შემთხვევაა, როდესაც პენტაგონმა მისი სიკვდილის შესახებ ინფორმაცია გაავრცელა.

ისლამური სახელმწიფოს წინააღმდეგ გაერთიანებული საერთაშორისო ჯგუფი ერაყში შეიარაღებულ თავდასხმებს 2014 წლიდან, იმ დროიდან ახორციელებს, რაც ISIS-ის მებრძოლებმა ერაყისა და სირიის ტერიტორიების დიდი ნაწილი დაიკავეს.