სახელმწიფო უსაფრთხოების სამსახურის უფროსის ყოფილი მოადგილე, სოსო გოგაშვილი, ფეისბუქის მიერ წაშლილ ყალბ ანგარიშებსა და დეზინფორმაციის გავრცელებასთან კავშირის მქონე სარეკლამო კომპანიას, პანდას მხარდაჭერას უცხადებს. პანდას მიმართ სოლიდარული პოსტი გოგაშვილმა ფეისბუქით გაავრცელა.

გოგაშვილი პანდას პირადი გამოცდილებით დახმარებასაც დაჰპირდა.

"პანდა თუ შეძლებს შეეჭიდოს ამ სიბინძურეს და დაამარცხებს ცილისმწამებელთა არმიას, ეს იქნება ქვეყნისთვის და ხალხისთვის ძალიან მნიშვნელოვანი! წარმატებები ამ ახალგაზრდებს. მე თუ რამეში გამოვადგები, მთელს ჩემს რესურს და გამოცდილებას დავახმარებ მათ", — წერს გოგაშვილი.

20 დეკემბერს სოციალური მედიის გიგანტმა ფეისბუქმა 396 გვერდი და ჯგუფი და ათეულობით ყალბი ანგარიში წაშალა. ამის მიზეზად დეზინფორმაციული და პროპაგანდისტული ინფორმაციების გავრცელება დასახელდა, რომლის კვალმა ფეისბუქის მკვლევარები მმართველ პარტიამდე, ქართულ ოცნებამდე მიიყვანა.