ევროკავშირი კიდევ ერთხელ მოუწოდებს საოკუპაციო რეჟიმს, რომ უკანონოდ დატყვევებული ექიმი ვაჟა გაფრინდაშვილი გაათავისუფლონ. ამის შესახებ ევროკავშირის საგარეო საქმეთა სამსახურის განცხადებაშია აღნიშნული.

"ევროკავშირმა არაერთხელ მოითხოვა ვაჟა გაფრინდაშვილის დაუყოვნებლივი გათავისუფლება, მისი დაკავების მომენტიდანვე. დღევანდელი მოვლენების გათვალისწინებით, კვლავ ვაჟღერებთ ჩვენს მოლოდინს, რომ ცხინვალში კონტროლის განმახორციელებელი ხელისუფლება დაუყოვნებლივ გაათავისუფლებს ბატონ ვაჟა გაფრინდაშვილს და ის ოჯახს დაუბრუნდება", — წერია განცხადებაში.

გარდა ამისა, ისინი აღნიშნავენ, რომ დაუყოვნებლივ უნდა გადაიდგას ნაბიჯები ადგილობრივი მოსახლეობისთვის შეზღუდული გადაადგილების თავისუფლების აღსადგენად.

საოკუპაციო რეჟიმმა ექიმ ვაჟა გაფრინდაშვილს 1 წლითა და 9 თვით უკანონო პატიმრობა მიუსაჯა. დე ფაქტო სასამართლომ ეს გადაწყვეტილება იმის გამო მიიღო, რომ გაფრინდაშვილი ე.წ. საზღვრის კვეთას არ აღიარებს და აცხადებს, რომ საქართველოს ტერიტორიაზე იმყოფება.

ექიმი საოკუპაციო ძალებმა 9 ნოემბერს კასპის რაიონში დააკავეს. ის ოკუპირებულ ტერიტორიაზე ავადმყოფი ქალის დასახმარებლად გადავიდა, რომელიც თბილისში სამკურნალოდ ვერ ჩამოდიოდა. ოკუპირებულ ახალგორში მცხოვრები 60 წლის ქალი ჭაში ჩავარდა და დაზიანებები მიიღო, თუმცა თბილისში ვერ გადაიყვანეს, რადგან საოკუპაციო რეჟიმს ე.წ. გამშვები პუნქტი ჩაკეტილი ჰქონდა.

გაფრინდაშვილის გათავისუფლების მოთხოვნით ოჯახმა, ოპოზიციამ და მთავრობამ სხვადასხვა საერთაშორისო პარტნიორებს მიმართა, თუმცა უშედეგოდ. ხელისუფლების წარმომადგენლები აცხადებდნენ, რომ ყველაფერს აკეთებდნენ გაფრინდაშვილის დროულად დასაბრუნებლად.

ამავე თემაზე: