2020 წლის მის ამერიკა ვირჯინიელი ბიოქიმიკოსი კამილ შრაიერი გახდა. მან თავის სასცენო ნომერში აუდიტორიის წინაშე სამეცნიერო ექსპერიმენტი ჩაატარა, რომლის მიზანიც კონკურსის მიმართ არსებული სტერეოტიპების დამსხვრევა იყო.

24 წლის ბიოქიმიკოსმა საკუთარი ნიჭის საჩვენებელ ნაწილში თეთრი ხალათი მოირგო. მან წყალბადის ზეჟანგის კატალიზური დაშლა აჩვენა, შემდეგ კი მასზე კალიუმის იოდიდი, საკვები საღებავი და ჭურჭლის ჟელე დაამატა, თან მაყურებლებს მოუწოდა, რომ იგივე სახლში არ გაემეორებინათ.

შრაიერმა 50 ათასი დოლარის ოდენობის სტიპენდია მოიგო და ერთი წლით, მის ამერიკის ტიტულის მატარებელი გახდა. ის საქველმოქმედო და ცნობიერების ასამაღლებელ კამპანიებში ჩაერთვება.

ფოტო: Miss America Organization

"2020 წელს მინდა დავამსხვრიო სტერეოტიპები მის ამერიკის ტიტულზე. მის ამერიკა უნდა იყოს ის, ვინც განათლებას შეუწყობს ხელს", — თქვა მან სამადლობელ სიტყვაში.

მის ამერიკა თავისი იმიჯის შეცვლას ცდილობს. 2018 წლის გადაწყვეტილებით, მის ამერიკას კონკურსანტებს საცურაო კოსტიუმებში აღარ აფასებენ. გასულ წელს პირველად ისტორიაში, მის ამერიკა, მის აშშ და მის თინეიჯერი აშშ შავკანიანი ქალები გახდნენ.