საქართველოს პრეზიდენტი, სალომე ზურაბიშვილი, პირველის პრეზიდენტის შვილის, ცოტნე გამსახურდიას მოსანახულებლად კლინიკაში მივიდა.

"ყველაფერი გაკეთდა, რისიც გაკეთებაც შეიძლება. იმისი დასტურიც მინდოდა, რომ შემდეგ ეტაპზე რაც იქნება საჭირო, ყველაფერი გაკეთდება. მთავარია, რომ ეს მძიმე პერიოდი გადავლახოთ, სადაც პროგნოზი ჯერ მძიმეა", — განაცხადა ზურაბიშვილმა.

რამდენიმე საათის წინ ხეჩინაშვილის კლინიკაში პირველი ოპერაცია დასრულდა. ქირურგი გიორგი გვახარია ჟურნალისტებთან საუბარში განმარტავს, რომ პაციენტის მდგომარეობა მძიმეა:

"პაციენტს აღენიშნება მრავლობითი დაზიანებები: დაზიანებულია გულმკერდის მარცხენა ნახევარი, აღენიშნება ნაჩხვლეტი ჭრილობები, გულმკერდის ღრუში შემავალი ჭრილობები მარცხენა ფილტვის ზედა წილის დაზიანებით. აღენიშნება ზურგის, მარცხენა ბეჭის მიდამოში ნაკვეთ-ნაჩხვლეტი ჭრილობა და თავის მიდამოში, თხემზე ოთხი ჭრილობა, ნაკვეთი და დაჟეჟილი ჭრილობები. მე და ჩემმა კოლეგებმა გავხსენით გულ-მკერდის ღრუ და ჩავატარეთ ოპერაცია".

საქართველოს პირველი პრეზიდენტის, ზვიად გამსახურდიას შვილი, ცოტნე გამსახურდია 19 დეკემბრის საღამოს დაჭრეს. შემთხვევა თბილისში, ვერაზე მოხდა. ფაქტზე გამოძიება სისხლის სამართლის კოდექსის 19-108 მუხლით დაიწყო, რაც განზრახ მკვლელობის მცდელობას გულისხმობს.