საქართველოს პრემიერ-მინისტრმა გიორგი გახარიამ და უკრაინის პრეზიდენტმა ვოლოდიმერ ზელენსკიმ ხელი მოაწერეს საქართველოსა და უკრაინის მაღალი დონის სტრატეგიული საბჭოს შექმნის შესახებ შეთანხმებას. ინფორმაციას პრემიერ-მინისტრის პრესსამსახური ავრცელებს.

ამავე ინფორმაციით, სტრატეგიული საბჭოს საქმიანობა ოთხ ძირითად მიმართულებას მოიცავს: პოლიტიკურს, სავაჭრო-ეკონომიკურს, თავდაცვა-უსაფრთხოებასა და კულტურულ-ჰუმანიტარულს. ამ მიმართულებებით შექმნილ სამუშაო ჯგუფებს შესაბამისი მინისტრები უხელმძღვანელებენ.

მათი ცნობით, პირისპირ შეხვედრისას, ლიდერებმა განიხილეს ორი ქვეყნის საერთო ევროპული პერსპექტივა და ტერიტორიულ მთლიანობასთან დაკავშირებული გამოწვევები. როგორც პრემიერ-მინისტრის პრესსამსახურის მიერ გავრცელებულ განცხადებაშია აღნიშნული, მხარეებმა ისაუბრეს სამომავლო თანამშრომლობის კიდევ უფრო გაღრმავებაზე, რომელიც ორიენტირებული იქნება უსაფრთხოების კუთხით საერთო გამოწვევების გადალახვაზე და წარმატების მიღწევაზე ორი სახელმწიფოს ევროატლანტიკური ინტეგრაციის მიმართულებით.

ამავე ინფორმაციის თანახმად, პირისპირ აუდიენციის შემდეგ უკრაინის პრეზიდენტის ადმინისტრაციაში გაფართოებული ფორმატის შეხვედრა გაიმართა, რომელსაც საქართველოს საგარეო საქმეთა მინისტრი დავით ზალკალიანი და პრემიერ-მინისტრის მრჩეველი საერთაშორისო ურთიერთობების საკითხებში ირაკლი ჩიქოვანი ესწრებოდნენ.