ქართული ოცნების ყოფილი დეპუტატის, თამარ ჩუგოშვილის თქმით, პოლიტიკური კრიზისიდან და დაძაბულობიდან გამოსავალი კომპორმისზე წასვლაა. მისი აზრით, ხელისუფლების მიზანი სიტუაციის განმუხტვა რომ ყოფილიყო, დიალოგზე წავიდოდა.

"სამწუხაროდ, პირველი ხელისუფლება არ არის უკვე მერამდენე ხელისუფლებაა, რომელიც თვლის, რომ პოლიტიკაში ძალა უნდა აჩვენოს, შეუპოვრობა უნდა აჩვენოს, დათმობაზე არ უნდა წავიდეს და რატომღაც ითვლება, რომ ეს არის ძლიერი პარტია. მე კიდევ მგონია, რომ ეს არის სისუსტე. მე მგონია, რომ ძლიერი პარტია არის ის, ვინც ახერხებს, რომ ლაპარაკით, პოლიტიკით, შეთანხმებით, კომპორომისით მოახერხოს და ქვეყანაში იყოს სტაბილურობა, სიმშვიდე და განვითარება. ეს არის პოლიტიკოსის როლი და არა ის, რომ პატრულით და პოლიციით შედიოდნენ სხდომათა დარბაზებში", — თქვა ტვ პირველის ეთერში თამარ ჩუგოშვილმა.

თამარ ჩუგოშვილმა კრიტიკულად შეაფასა მმართველი გუნდის ნაბიჯები. მისი თქმით, ხელისუფლება პასუხისმგებელია ყველა მოქალაქეზე და არა მხოლოდ საკუთარ ამომრჩევლებზე.

პროპორციულ საარჩევნო სისტემაზე გადასვლის კანონპროექტის ჩაგდების შემდეგ ქართული ოცნება და საპარლამენტო უმრავლესობა 12-მა დეპუტატმა დატოვა, მათ შორის სხვადასხვა კომიტეტების თავმჯდომარეებმა. წამოსულ დეპუტატებს შორის არიან ქართული ოცნების აქტიური სახეები: თამარ ჩუგოშვილი, თამარ ხულორდავა, დიმიტრი ცქიტიშვილი, ზვიად ძიძიგური, მარიამ ჯაში.