"ქართული ოცნების დუმილი უფრო მნიშვნელოვანია ჩემთვის, ვიდრე მეჭიაურის განცხადება", - ასე გამოეხმაურა რუსთავი 2 -თან საუბარში შერიგებისა და თანასწორობის საკითხებში სახელმწიფო მინისტრი, პაატა ზაქარეიშვილი თამაზ მეჭიაურის დღეს გაკეთებულ განცხადებას იმასთან დაკავშირებით, რომ თუ საქართველო აფხაზეთსა და სამაჩაბლოზე უარს არ იტყვის, ნატოში ვერ შევა.

ჟურნალისტის შეკითხვას, რას უკავშირებს ზაქარეიშვილი მეჭიაურის განცხადებას, მინისტრმა უპასუხა:

"ძნელი სათქმელია. სიმართლე გითხრათ, არც მაინტერესებს. ბატონი მეჭიაური, თავისთავად, არა როგორც მარტო ადამიანი არაფერი არაა ანუ ჩემთვის უფრო მნიშვნელოვანია, როგორ უყურებს ამას ქართული ოცნება".

პრემიერ მინისტრის, გიორგი კვირიკაშვილის განმარტებით კი, ზაქარეიშვილის მიერ გაკეთებული განცხადება ნაჩქარევი და ობიექტურობას დაშორებულია:

"საქართველოს მთავრობის წევრი გამოხატავს უკმაყოფილებას საქართველოს მთავრობის, მისი აზრით, დუმილის გამო. ეს არის მისი გადაწყვეტილება. თუ მას გააჩნია სხვა მოსაზრებები, მიიღოს ჩვეულებრივი, ადამიანური გადაწყვეტილება. მე მგონია, რომ მთავრობის წევრის მხრიდან მმართველი ძალის, მითუმეტეს არაობიექტური კრიტიკა, არის ძალიან გასაკვირი და მიუღებელიც".

პრემიერი განცხადებას გამოეხმაურა ფრაქცია რესპუბლიკელების თავჯდომარე, დავით ბერძენიშვილი და აღნიშნა, რომ კვირიკაშვილი მეჭიაურის განცხადებაში პრობლემას უნდა ხედავდეს. ბერძენიშვილმა მეჭიაურის პარტიიდან გარიცხვაც მოითხოვა:

"საპარლამენტო უმრავლესობის ლიდერი დუმს რამდენიმე დღეა მიუხედავად იმისა, რომ ინფორმირებულია, რა შეტევა მიმდინარეობს საქართველოს საგარეო კურსზე. როდესაც რამდენიმედღიანი დუმილის შემდეგ, რესპუბლიკელმა მინისტრმა, ზაქარეიშვილმა თქვა, რომ მას მეჭიაურის განცხადება კი არ აკვირვებს, მას პარტია ქართული ოცნების დუმილი აკვირვებს. დღეს გამოეხმაურა ამ თემას პრემიერი კვირიკაშვილი და თქვა, რომ მეჭიაურის ხაზი კი არ არის ქართული ოცნების ხაზი, ეს გასაგებია, მაგრამ მას ძალიან აკვირვებს და არ მოსწონს რესპუბლიკელი მინისტრის, ზაქარეიშვილის განცხადება".

ამავე ფრაქციის თავდჯომარე, ხათუნა სამნიძე მიიჩნევს, რომ აუცილებელია, პასუხი გაეცეს მეჭიაურის განცხადებას, რომელიც საფრთხეს უქმნის მთელ ქვეყანას საკუთარი ანტიდასავლური და საფრთხისშემცველი განცხადებებით. მისი განმარტებით, პრემიერის განცხადება არაობიექტურია, რადგან ზაქარეიშვილმა პასუხი პარტია ქართული ოცნების ლიდერებისგან მოითხოვა და არა მთავრობის წევრებისგან, როგორც ეს პრემიერის მხრიდან გაჟღერდა.

მეჭიაურის განცხადებას ეხმაურება პარლამენტის თავჯდომარე, დავით უსუფაშვილიც და განმარტავს, რომ საქართველოს აქვს დასავლური კურსი და ვისაც ამ კუთხით პრობლემა აქვს, ის ადამიანურადაც და პოლიტიკურადაც თავად არის ჩამოსაყალიბებელი.

დღეს, 9 მაისს, უმრავლესობის წევრმა, თამაზ მეჭიაურმა განაცხადა, რომ თუ საქართველო სამხრეთ ოსეთისა და აფხაზეთის დაბრუნებაზე უარს არ იტყვის, ის NATO-ში ვერ შევა.