პოლონეთში მდებარე აუშვიცის (ოსვენციმის) საკონცენტრაციო ბანაკის მემორიალურმა მუზეუმმა კომპანია Amazon საჯაროდ გააკრიტიკა, რადგან ამ ინტერნეტმაღაზიაში საახალწლო დეკორაციები გამოჩნდა, რომლებზეც აუშვიცის საკონცენტრაციო ბანაკის ილუსტრაციებია გამოსახული.

"აუშვიცის გამოსახულებებით გაფორმებული საახალწლო დეკორაციების გაყიდვა მართებული საქციელი სულაც არ არის, პირიქით — აუშვიცის ბანაკის ილუსტრაციებით გაფორმებული სათამაშოები უპატივცემულობის გამოხატულებაა", — ვკითხულობთ მუზეუმის მიერ ტვიტერზე გამოქვეყნებულ განცხადებაში.

საახალწლო დეკორაციებზე გამოსახული აუშვიცის ბანაკი მეორე მსოფლიო ომის დროს ერთ-ერთი ყველაზე დიდი საკონცენტრაციო ბანაკი იყო, სადაც მილიონზე მეტი ებრაელი დაიღუპა. ამის გამო აუშვიცი ხშირად ჰოლოკოსტის — ებრაელების მასობრივი გენოციდის სიმბოლოდ ითვლება.

მუზეუმის მიერ გამოქვეყნებული განცხადებისა და ათასობით ინტერნეტმომხმარებლის მიერ გამოთქმული აღშფოთების შემდეგ ამაზონმა პროდუქცია გაყიდვიდან ამოიღო.

"ყველა გამყიდველმა უნდა გაითვალისწინოს ჩვენი წესები და ვინც ასე არ არ მოიქცევა, პროდუქციის ამოღებასთან ერთად, მისი პირადი ანგარიშის სრულად გაუქმების ალბათობაც არსებობს", — განაცხადა ამაზონის წარმომადგენელმა.