დემოკრატმა ჰილარი კლინტონმა რესპუბლიკელების საპრეზიდენტო კანდიდატ დონალდ ტრამპს "პუტინის სათამაშო" უწოდა. რუსეთი ამერიკის სადაზვერვო უწყების თანამშრომლებმა უკვე დაადანაშაულეს აშშ-ს საპრეზიდენტო არჩევნებში ჩარევაში. ინფორმაციას როიტერი ავრცელებს.

მესამე საპრეზიდენტო დებატებზე, მოდერატორმა კრის ვალესმა კლინტონს ჰკითხა, სურდა თუ არა მას საზღვრების გახსნა, დემოკრატების კანდიდატმა უპასუხა, რომ ის ამ კითხვით ვიკილიქსს ციტირებს, რომელმაც ცოტა ხნის წინ გამოაქვეყნა ჰილარი კლინტონის გატეხილი იმეილების ნაწილის შინაარსი:

"აშკარაა, რომ შენ WikiLeaks-ის ინფორმაციიდან ახდენ ციტირებას. მნიშვნელოვანია ყველამ იცოდეს, რას წარმოადგენს ვიკილიქსი. მისი ხელით და ჯაშუშობის გზით მოქმედებს რუსეთის მთავრობა ამერიკელების წინააღმდეგ. ისინი აღწევენ ჩვენი მოქალაქეების პირად სივრცეში და ტეხენ ამერიკულ ვებსაიტებს, პიროვნებებისა და ინსტიტუტების იმეილებს, შემდეგ ამ ინფორმაციას რუსეთი გადასცემს ვიკილიქსს, რომელიც მათ ინტერნეტში ათავსებს".

კლინტონმა მოდერატორს უთხრა, რომ დებატების მთავარი კითხვა იქნებოდა, მიიჩნევს თუ არა ტრამპი, რომ რუსეთი ჯაშუშების გზით ცდილობს ამერიკის არჩევნების ჩარევას და იღებს თუ არა ის დახმარებას ვლადიმერ პუტინისგან, თავისი საარჩევნო კამპანიის დროს.

ტრამპმა უარყო შესაძლებლობა, რომ დემოკრატების იმეილების გატეხვის უკან რუსეთი იდგა.

"ის ჩემზე კარგ რამეებს ამბობს, მაშინ როცა პატივს არ სცემს ჰილარი კლინტონს და ბარაკ ობამას, და რომ იცოდეთ, ეს სერიოზულ საფრთხეს გვიქმნის" - თქვა რესპუბლიკელების კანდიდატმა მესამე საპრეზიდენტო დებატებზე.

"ეს იმიტომ, რომ მას [პუტინს] ურჩევნია ჰყავდეს სათამაშო ამერიკის შეერთებული შტატების პრეზიდენტის პოსტზე" - უპასუხა კლინტონმა.

"არა ეს შენ ხარ სათამაშო" - არ ჩამორჩა ტრამპი, "კლინტონს არ მოსწონს პუტინი, რადგან ის გონიერი ადამიანია" - დასძინა მან.

რამდენიმე დღით ადრე, პუტინმა ასევე განაცხადა, რომ პრეზიდენტი თუ გახდებოდა, მისი პირველი საგარეო შეხვედრა პუტინთან შედგებოდა.

ეროვნული სადაზვერვო დეპარტამენტის ინფორმაციით, დემოკრატების პარტიის საიტებზე და იმეილებზე კიბერ-შეტევა რუსეთიდან განხორციელდა, რაც პუტინმა უარყო.

მას შემდეგ, რაც ტრამპმა განაცხადა, რომ ვლადიმერ პუტინი უკეთესი ლიდერია, ვიდრე ბარაკ ობამა, ის ჰილარი კლინტონმა და ასევე რესპუბლიკური პარტიის რამდენიმე წარმომადგენელმა გააკრიტიკეს რუსეთის პრეზიდენტის მიმართ მეტისმეტი ლოიალურობის გამო.

ამერიკისა და რუსეთის ურთიერთობა განსაკუთრებით მას შემდეგ დაიძაბა, რაც პუტინი სირიის კონფლიქტში ჩაერია, ყირიმში შეიჭრა და კიბერ-შეტევებზე გახდა ცნობილი.

მესამე საპრეზიდენტო დებატები სრულად.