28 ნოემბერს პარლამენტის წინ მიმდინარე საპროტესტო აქციაზე მოძრაობა შეცვალეს დაკავებულ წევრს, ბექა პაპაშვილს თბილისის საქალაქო სასამართლომ ხუთდღიანი ადმინისტრაციული პატიმრობა შეუფარდა. მის გარდა, გუშინდელ აქციაზე კიდევ ერთი პირი დააკავეს.

დაკავებულებს ბრალი ადმინისტრაციული სამართლის კოდექსის 166-ე და 173-ე მუხლებით აქვთ წარდგენილი. მუხლები წვრილმან ხულიგნობასა და პოლიციელის მოთხოვნის დაუმორჩილებლობას გულისხმობს.

როგორც თბილისის საქალაქო სასამართლოში On.ge-ს უთხრეს, პაპაშვილის მიმართ მტკიცებულებების არარსებობის გამო შეწყდა სამართალწარმოება წვრილმანი ხულიგნობის მუხლით, ხოლო პოლიციელის მოთხოვნის დაუმორჩილებლობის ბრალდებით ხუთდღიანი ადმინისტრაციული პატიმრობა შეუფარდეს.

"მოსამართლე გაოგნებული იყო და ბრალდების მხარე გაწბილებული, რომ მტკიცებულებებით ვერაფერს ამტკიცებდნენ, მხოლოდ ის მტკიცდებოდა, რომ ბექა პაპაშვილი იყო უდანაშაულო", — განუცხადა დაკავებულის ადვოკატმა რუსთავი 2-ს.

პარლამენტთან მიმდინარე აქციის მონაწილეები 26 ნოემბერსაც დააკავეს. გამთენიისას პარლამენტთან შეკრებილი აქტივისტები, ისევ სპეცრაზმისა და წყლის ჭავლის გამოყენებით დაშალეს. დაშავდა 3 ადამიანი, 28 კი დააკავეს.

დღეს, 29 ნოემბერს საპროტესტო აქცია მიმდინარეობდა ეროვნული ბიბლიოთეკის ერთ-ერთ კორპუსთან, სადაც იუსტიციის მინისტრი, თეა წულუკიანი ღონისძიებას ესწრებოდა. აღნიშნული აქციაზე ადმინისტრაციული წესით ექვსი პირი დააკავეს.

ბოლო დღეების მოვლენები

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. პროტესტის ფარგლებში პიკეტირებული იყო მთავარი საკანონმდებლო ორგანოც, რომლის შესასვლელებიც ხელისუფლებამ სპეცრაზმისა და წყლის ჭავლის გამოყენებით გახსნა.

აქციის დაშლის შემდეგ ოპოზიციამ და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. ისინი სხვადასხვა ადმინისტრაციულ შენობებს ბოქლომებს ადებენ. პროტესტის მონაწილეებმა სიმბოლურად უკვე "დააბოქლომეს" პროკურატურა, სახელმწიფო უსაფრთხოების სამსახური, მთავრობის კანცელარია. ასევე, ისინი ბოქლომს ადებენ მაჟორიტარი დეპუტატების ოლქებს.

ოპოზიციამ და მათმა მხარდამჭერებმა აჭარის უმაღლესი საბჭოს ჭიშკარზე ბოქლომი ჩამოკიდეს. გარდა ამისა, ბოქლომები დაადეს პარლამენტის თავმჯდომარის, არჩილ თალაკვაძისა და დეპუტატ მიხეილ ყაველაშვილის ბიუროს ოფისებს. "დაბოქლომებულია" ასევე მთავრობის კანცელარია, პროკურატურა და პრეზიდენტის რეზიდენცია.