შინაგან საქმეთა სამინისტროს ინფორმაციით, ბიბლიოთეკასთან მიმდინარე აქციაზე 6 პირი ადმინისტრაციულ სამართალდარღვევათა კოდექსით დააკავეს. მათი თქმით, დეპუტატი გიორგი კანდელაკი და პოლიტიკოსი გიგი უგულავა დაკავებულები არ იყვნენ და მხოლოდ განარიდეს.

საპროტესტო აქციამ პარლამენტიდან ეროვნულ ბიბლიოთეკასთან მას შემდეგ გადაინაცვლა, რაც ცნობილი გახდა, რომ იუსტიციის მინისტრი თეა წულუკიანი იქ შეხვედრას მართავდა. ადგილზე მობილიზებული იყო პოლიცია, რომელიც აქციის მონაწილეებს ბიბლიოთეკაში შესვლის საშუალებას არ აძლევდა.

წულუკიანი ბიბლიოთეკაში პოლიციის კორდონით შევიდა, რა დროსაც დაპირისპირება დაიწყო. პოლიციამ ძალის გამოყენებით გაიყვანა ევროპული საქართველოს წევრი გიგი უგულავა.

მალევე დააკავეს რამდენიმე აქტივისტი.

მოგვიანებით, მათ ტერიტორიიდან გაიყვანეს ევროპული საქართველოს დეპუტატი გიორგი კანდელაკიც. ადგილზე მყოფი On.ge-ს ჟურნალისტის ინფორმაციით, პოლიცია გეგმავდა სერგო რატიანის გაყვანასაც, თუმცა მას შემდეგ, რაც აქტივისტებმა იყვირეს, რომ ის დეპუტატი იყო, რატიანი ადგილზე დატოვეს.

თეა წულუკიანმა შენობა ისევ პოლიციის კორდონით დატოვა და განაცხადა, რომ არანაირ დისკომფორტს არ განიცდიდა. მისი თქმით, ასეთ ფონსა და რეკლამაზე მხოლოდ იოცნებებდა.

ეს პირველი შემთხვევა არ არის, როდესაც საპროტესტო აქციის მონაწილეებს ადმინისტრაციულ სამართალდარღვევათა კოდექსით აკავებენ.

ბოლო დღეების მოვლენები

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. პროტესტის ფარგლებში პიკეტირებული იყო მთავარი საკანონმდებლო ორგანოც, რომლის შესასვლელებიც ხელისუფლებამ ორჯერ სპეცრაზმისა და წყლის ჭავლის გამოყენებით გახსნა.

აქციის დაშლის შემდეგ ოპოზიციამ და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. ისინი სხვადასხვა ადმინისტრაციულ შენობებსა და ქართული ოცნების დეპუტატების ოფისებს ბოქლომებს ადებენ.

მას შემდეგ, რაც პარლამენტის პიკეტი მესამედ დაანონსდა, ხელისუფლებამ პარლამენტის მიმდებარე ქუჩები რკინის კონსტრუქციებით ჩაკეტა. კონსტრუქციები ხელს უშლიდა მოქალაქეებს გადაადგილებაში. პოლიციამ გზები აქციის დაშლის შედეგ გაათავისუფლა.