ევროკავშირის ელჩი, კარლ ჰარცელი პოლიტიკურ პროცესებზე ხელისუფლება-ოპოზიციის დაგეგმილ შეხვედრას გამოეხმაურა და თქვა, რომ დროა, მხარეებმა ნაკლები ილაპარაკონ ერთმანეთზე და მეტი ერთმანეთთან. ამის შესახებ ელჩმა დღეს, 29 ნოემბერს ევროინტეგრაციის კომიტეტის წევრებთან შეხვედრამდე ჟურნალისტებს უთხრა:

"მოხარული ვარ, რომ ეს მიმართულება უკვე აღებულია და ხვალ შედგება დიალოგი. მიგვაჩნია, რომ ის აუცილებელია და რა თქმა უნდა, მონაწილე მხარეებზე დამოკიდებული როგორი ფორმატი იქნება. მოუთმენლად ველით, რომ ფართო დისკუსია იქნება იმ პოლიტიკურ ვითარებაზე, რაც არსებობს, რა თქმა უნდა, საერთაშორისო გაერთიანებების მხრიდანაც ვიქნებით ჩართული ამ დიალოგში".

პროპორციული სისტემის კანონპროექტის ჩაგდების შემდეგ სამოქალაქო სექტორმა და ოპოზიციურმა პარტიებმა ერთობლივად შესთავაზეს ხელისუფლებას ე.წ. გერმანულ მოდელზე გადასვლა. ვინაიდან კანონპროექტის ჩაგდების მიზეზად მაჟორიტარი დეპუტატების უკმაყოფილება დასახელდა, პროტესტის მონაწილეებმა განაცხადეს, რომ ეს მოდელი მათ პარლამენტში მოხვედრასაც ითვალისწინებდა.

კერძოდ, მოდელის მიხედვით, პარლამენტში ადგილები არჩევნებზე მიღებული ხმების შესაბამისად განაწილდება. მისი საშუალებით, გამარჯვებული მაჟორიტარები იღებენ მანდატებს და შემდგომ მათ პარტიული სიიდან ემატებათ იმდენი დეპუტატი, რამდენიც მათ პროპორციის შესაბამისად ეკუთვნით.

მმართველი გუნდი შეთავაზებას არ დათანხმდა. ქართული ოცნების გენერალური მდივანი კახა კალაძე აცხადებდა, რომ თემა დახურულია და ისინი სხვა ფორმატზე აღარ იმსჯელებენ.

ბოლო დღეების მოვლენები

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. პროტესტის ფარგლებში პიკეტირებული იყო მთავარი საკანონმდებლო ორგანოც, რომლის შესასვლელებიც ხელისუფლებამ ორჯერ სპეცრაზმისა და წყლის ჭავლის გამოყენებით გახსნა.

აქციის დაშლის შემდეგ ოპოზიციამ და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. ისინი სხვადასხვა ადმინისტრაციულ შენობებსა და ქართული ოცნების დეპუტატების ოფისებს ბოქლომებს ადებენ.

მას შემდეგ, რაც პარლამენტის პიკეტი მესამედ დაანონსდა, ხელისუფლებამ პარლამენტის მიმდებარე ქუჩები რკინის კონსტრუქციებით ჩაკეტა. კონსტრუქციები ხელს უშლიდა მოქალაქეებს გადაადგილებაში. პოლიციამ გზები აქციის დაშლის შედეგ გაათავისუფლა.