უმრავლესობის ყოფილი დეპუტატი, ზაზა ხუციშვილი ფიქრობს, რომ პარლამენტის პიკეტირება არ არის ის ფორმა, რაც შედეგს მოიტანს. როგორც პარლამენტში მისულმა ხუციშვილმა ჟურნალისტებს განუცხადა, პროპორციული სისტემით ვადამდელი არჩევნების მოთხოვნა "აბსურდულია".

"შედეგს მოიტანს არჩევნები. 2012 წელს, როდესაც ამომრჩევლის კრიტიკული მასა შეიქმნა, იმ შერეული სისტემით შეიცვალა ხელისუფლება. ამიტომ უნდა მოემზადონ არჩევნებისთვის. კარგი იყო, რომ გადასულიყო პროპორციულ სისტემაზე, მაგრამ ეს ქმედებები არ არის. მითუმეტეს, როდესაც მესმის, რომ ვადამდელი არჩევნები პროპორციულად, ეს უკვე აბსურდია. რა გამოდის, ვინ უნდა გადაიყვანოს პროპორციულ სისტემაზე? — ისევ პარლამენტმა, პარლამენტი კენჭს არ უყრის. მე საერთოდ არ მესმის ეს ვადამდელი არჩევნები ვისთვის არის კარგი", — განაცხადა ხუციშვილმა.

ზაზა ხუციშვილი ერთ-ერთია იმ დეპუტატთა შორის, რომელმაც 2020 წლისათვის სრულად პროპორციულ სისტემაზე გადასვლის ჩაგდების შემდეგ უმრავლესობა დატოვა.

დილიდან საკანონმდებლო ორგანოს პიკეტირება იგეგმებოდა, თუმცა პოლიცია ოპოზიციის წევრებს მომზადებული დახვდა. პარლამენტის შენობის ყველა შესასვლელთან პოლიცია მობილიზებულია. საკანონმდებლო ორგანოსთან მისასვლელი ყველა გზა რკინის ჯებირებით არის გადაკეტილი.

პარლამენტის პიკეტირება 26 ნოემბერს დაანონსდა. მოქალაქეები, რომლებიც ბიძინა ივანიშვილის დაპირების არშესრულებას აპროტესტებენ თითქმის 10 დღეა აქციას მართავენ. მათ უნდათ, რომ პროპორციულ სისტემაზე გადასვლის კანონპროექტის ჩამგდები მმართველი პარტიის წევრები პარლამენტში არ შეუშვან. პარლამენტის სხდომებს ბოიკოტის ნიშნად არ ესწრება ნაციონალური მოძრაობა, ევროპული საქართველო და სხვა დამოუკიდებელი დეპუტატები.