თბილისის მერმა, კახა კალაძემ განაცხადა, რომ კვლევის შედეგად დადგინდა, რომ ქალაქისთვის მიკროავტობუსების როლი და არსებობა აუცილებელია. გარდა ამისა, მან აღნიშნა, რომ მიკროავტობუსების ძველი ავტოპარკის განახლება/ჩანაცვლება 2020 წლიდან უნდა დაიწყოს. ამის შესახებ მან მთავრობის სხდომაზე განაცხადა.

კომპანია სისტრას კვლევაზე დაყრდნობით, კალაძე განმარტავს, რომ ქალაქის ქუჩების გაბარიტებისა და ავტობუსების მოცულობიდან გამომდინარე, ყველა ქუჩაზე შეუძლებელი იქნება იმ ავტობუსების მოძრაობა, რომელიც მერიას შემოჰყავს.

"შესაბამისად კვლევამ გვიჩვენა, რომ მიკროავტობუსების როლი შიდასაუბნო დონეზე არის ძალიან მნიშვნელოვანი", — განაცხადა თბილისის მერმა.

გარდა ამისა, მან მიკროავტობუსების მდგომარეობაზე ისაუბრა და აღნიშნა, რომ მათი კრიტიკული მდგომარეობა მალევე უნდა აღმოიფხვრას. მან ვიცე-მერს, ირაკლი ხმალაძეს დაავალა, რომ კომპანია თბილისის მიკროავტობუსთან ავტოპარკის განახლებაზე მოლაპარაკება დაიწყოს.

"თქვენ იცით, რომ ეს არის კერძო კომპანიის საკუთრება და ჯერ კიდევ წინა ხელისუფლების დროს გაფორმდა ხელშეკრულება, რომელიც 2030 წლამდეა. რაც შეიძლება სწრაფად უნდა დაიწყოს მიკროავტობუსების განახლების პროცესი. ორ კვირაში წარმოადგინეთ კონკრეტული გეგმა, რომ 2020 წლიდან დაიწყოს ჩანაცვლების პროცესი", — აღნიშნა მერმა.

ჯერ კიდევ ოქტომბრის დასაწყისში კახა კალაძემ აღნიშნა, რომ სურს, ე.წ. ყვითელი მარშრუტკები საქართველოში წარმოებული მიკროავტობუსებით ჩაანაცვლოს.