ქართული ოცნების ყოფილი წევრი, თამარ ჩუგოშვილი ამბობს, რომ ბედნიერია, რადგან არ მოუწია ბიუროს იმ სხდომაზე ჯდომა, რომელიც გუშინ, 18 ნოემბერს აქციის დაშლის შემდეგ გაიმართა. ამის შესახებ მან TV პირველის ეთერში ისაუბრა.

"ერთი, რაც მიხაროდა, გუშინ იმ ბიუროს სხდომაზე არ უნდა ვყოფილიყავი, არ მეკუთვნოდა იმ სხდომაზე დასწრება. ძალიან მძიმე იქნებოდა ჩემთვის იმ პროცესების შემდეგ ვყოფილიყავი ერთ-ერთი დეპუტატი, რომელიც ამ ფორმით უნდა შევსულიყავი და გამეგრძელებინა მუშაობა, ვითომ არაფერი", — თქვა ჩუგოშვილმა.

ბოლო დღეების მოვლენები მოკლედ

ამჟამად პარლამენტის შენობა ბლოკირებული აღარ არის. აქციის მონაწილეები ამბობდნენ, რომ არ შეუშვებდნენ არც ერთ დეპუტატს. შესასვლელებში გაშლილი იყო კარვები და დააწყეს ტომრები, ევროპულმა საქართველომ ყველა შესასვლელ ჭიშკარს სიმბოლურად ბოქლომი დაადო.

ასევე, პიკეტი მოხსნეს პარლამენტის შესასვლელებს. აქციის დაშლისას მინიმუმ 37 ადამიანი დააკავეს. ამ ოპერაციის შემდეგ დეპუტატები პარლამენტში შევიდნენ და ბიუროს სხდომა გამართეს.

აქცია თბილისის ქუჩებში მას შემდეგ იმართება, რაც ბიძინა ივანიშვილის დაპირება არ შესრულდა. მმართველმა პარტიამ ჩააგდო საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო. მმართველი პარტიის ამ გადაწყვეტილებამ ოპოზიციური პარტიები საერთო მოთხოვნის ირგვლივ გააერთიანა. მოთხოვნას იზიარებენ სამოქალაქო სექტორის წარმომადგენლები და მოძრაობა ქვეყნის სამსახურში.