თბილისის საქალაქო სასამართლოს მოსამართლემ, ვალერიან ფილიაშვილმა 18 ნოემბერს პარლამენტის მიმდებარედ აქციის დაშლის დროს დაკავებულ 8 პირის ადვოკატებს მტკიცებულებების წარსადგენად ორსაათიანი დრო მისცა. მოსამართლემ იფიქრა, რომ საღამოს 8-დან 10 საათამდე მტკიცებულებების მოძიება შესაძლებელია.

უფლებადამცველები მინიმუმ ერთ სამუშაო დღეს ითხოვდნენ, რადგან მათ აქამდე დაკავებულებთან გასაუბრების დროც კი არ ჰქონიათ.

მოსამართლე ფილიაშვილისთვის ეს 18 ნოემბერს დაკავებულების საქმის განხილვის მესამე პროცესია. ახლა ის ირაკლი ჩიხრაძის, ლევან გორგაძის, დავით ბერუაშვილის, რევაზ ნიჟარაძის, გოჩა მჟავანაძის, ნოე ლაშხის, ხვიჩა ბიწაძისა და პაატა მანჯგალაძის ეპიზოდებს განიხილავდა.

აქციის დაშლის დროს დაკავებულების საქმეს ფილიაშვილი დღეს დილიდან განიხილავს. ამ დრომდე მან კიდევ ორი პროცესის ჩატარება შეძლო და ის სხდომები ორი და ერთი საათით გადადო, თუმცა ჯერ არ განახლებულა.

ბოლო დღეების მოვლენები მოკლედ

ამჟამად პარლამენტის შენობა ბლოკირებული აღარ არის. აქციის მონაწილეები ამბობდნენ, რომ არ შეუშვებდნენ არც ერთ დეპუტატს. შესასვლელებში გაშლილი იყო კარვები და დააწყეს ტომრები, ევროპულმა საქართველომ ყველა შესასვლელ ჭიშკარს სიმბოლურად ბოქლომი დაადო.

ასევე, პიკეტი მოხსნეს პარლამენტის შესასვლელებს. აქციის დაშლისას მინიმუმ 37 ადამიანი დააკავეს. ამ ოპერაციის შემდეგ დეპუტატები პარლამენტში შევიდნენ და ბიუროს სხდომა გამართეს.

აქცია თბილისის ქუჩებში მას შემდეგ იმართება, რაც ბიძინა ივანიშვილის დაპირება არ შესრულდა. მმართველმა პარტიამ ჩააგდო საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო. მმართველი პარტიის ამ გადაწყვეტილებამ ოპოზიციური პარტიები საერთო მოთხოვნის ირგვლივ გააერთიანა. მოთხოვნას იზიარებენ სამოქალაქო სექტორის წარმომადგენლები და მოძრაობა ქვეყნის სამსახურში.